पर्सा, बारामा सर्पदंशका घटनामा वृद्धि

वीरगंज (पर्सा), २ भदौ । पर्सा र बारामा केहि साता यता सर्पदशंका घटना बढेको छ । पर्साको वीरगन्जस्थित नारायणी अस्पतालमा दिनहुँ सात आठ जना बिरामी उपचारका लागि आउने गरेका छन । मंगलबारपनि नारायणी अस्पतालमा सर्प दंशबाट गम्भीर घाइते एक महिलासहित चार जनाको उपचार भइरहेको छ ।

अस्पतालका चिकित्सक डा. दीपक चौरसियाका अनुसार, बाराको जीतपुरसिमरा उपमहानगरपालिका–९ की ५० वर्षीया रामपती देवी, पर्साको कालिकामाई गाउँपालिका–२ का २७ वर्षीया रिमा चौरसिया, २० वर्षीया प्रिन्स चौरसिया र बहुदरमाई नगरपालिका–८ रामनगरीकी ८ वर्षीया मनिषा पटेलको उपचार भईरहेको हो ।

डा. चौरसिया नेतृत्वकै स्वास्थ्यकर्मीको टोलीले उनिहरुको उपचार गरिरहेको छ । चर्को गर्मी र बर्षा पछिको बाफिलो वातावरणका कारण सर्पहरू बाहिर निश्कने हुँदा सर्पदंशको घटना बृद्धि भएको विज्ञहरूको भनाई छ । केही दिन अघि एन्टी स्नेक भेनमको अभाव हुँदा उपचार प्रभावित बनेको नारायणी अस्पतालमा अहिले भने सरकारले एन्टी स्नेक भेनम केहि डोज पठाए पछि सर्पदंशको उपचार भईरहेको छ ।