जनकपुरधाम (धनुषा), ३१ साउन । मिथिलाञ्चलमा धार्मिक तथा सांस्कृतिक पर्व झुलनोत्सव शनिबा।देखि सुरु भएको छ । साउन शुक्ल तृतीयादेखि सुरु हुने झुलनोत्सव पूर्णिमासम्म मनाउने गरिन्छ । पर्व सुरु भएसँगै जनकपुरधामका मठमन्दिरमा झुला सजाउने र भगवान् सीताराम तथा राधाकृष्णलाई झुलाउने क्रम सुरु भएको छ ।
यस अघि शनिबार जनकपुरधामस्थित राम मन्दिर, जानकी मन्दिर लगायतका मन्दिरहरुबाट भगवान सीतारामको प्रतिमा रथमै राखेर रंगभूमि मैदान १२ बिघामा जम्मा भएको थियो । त्यस लगत्तै झुलनोत्सवका अवसरमा मिथिलाका मठमन्दिरमा विशेष सिंहासन निर्माण गरी आकर्षक रूपमा सजाइएको गद्दीमा भगवान् राम–सीतासहित विभिन्न देवीदेवताका मूर्ति राखेर झुलाउने परम्परा शुरु हुन्छ ।
मिथिलाञ्चलका अधिकांश मठमन्दिरमा झुलनोत्सव मनाइए पनि जनकपुरधामका मन्दिरहरूमा यसको विशेष रौनक देखिन्छ । जानकी मन्दिरसहित विभिन्न मठमन्दिरमा आकर्षक झुला तथा सिंहासन तयार पारेर सजाइएको छ । साँझदेखि भगवान् सीताराम तथा राधाकृष्णका मूर्तिलाई झुलामा राखेर भजन–कीर्तनसहित पूजा आराधना गर्ने गरिन्छ ।
झुलनोत्सव धार्मिक अनुष्ठानमा मात्र सीमित नभई मिथिलाको लोकसंस्कृति र मनोरञ्जनसँग समेत जोडिएको छ । उत्सव अवधिभर विभिन्न मठमन्दिरमा नाटक, नाचगान, भजन–कीर्तन तथा लोककथा वाचनलगायतका सांस्कृतिक कार्यक्रम आयोजना हुने गर्छन् । भगवान् राम–जानकी तथा राधाकृष्णलाई झुलामा राखेर पूजा गर्ने परम्पराले भक्तजनलाई धार्मिक अनुभूति दिलाउने गरेको छ भने मठमन्दिरमा आयोजना हुने सांस्कृतिक गतिविधिले पर्वलाई थप आकर्षक बनाउने गरेको छ ।
साउन शुक्ल तृतीयादेखि पूर्णिमासम्म चल्ने झुलोनोत्सव अवधिभर जनकपुरधामका मठमन्दिरमा भक्तजनको चहलपहल बढ्ने गर्छ । मिथिलाको धार्मिक आस्था, सन्त परम्परा र लोकसंस्कृतिको संगमका रूपमा रहेको झुलोनोत्सवले जनकपुरधामको सांस्कृतिक पहिचानलाई समेत जीवन्त बनाउँदै आएको छ ।
प्रतिक्रिया दिनुहोस् !