सुनसरी र सिरहा जिल्लाको प्रदर्शनमा ज्यान गुमाएका ४ जनालाई सहिद घोषणा गरिने

काठमाडौँ, २६ साउन । सरकारले सुनसरी र सिराहा जिल्लामा भएको प्रदर्शनका क्रममा मृत्यु भएका चारजनालाई सहिद घोषणा गर्ने निर्णय गरेको छ । मन्त्रिपरिषद्को साउन २६ गते बसेको बैठकले सुनसरीका ओमप्रकाश मेहता, जयप्रकाश मेहता, रवीन्द्रकुमार मेहता तथा सिराहाका गणेशकुमार यादवलाई सहिद घोषणा गर्ने निर्णय गरेको हो ।

शिक्षा, विज्ञान तथा प्रविधि एवं खेलकुदमन्त्री तथा सरकारका प्रवक्ता सस्मिता पोखरेलले मन्त्रिपरिषद् बैठकका निर्णय सार्वजनिक गर्दै उक्त जानकारी दिनुभएको हो । यसैगरी सरकारले विद्युतीय एम्बुलेन्स तथा शव वाहनमा लाग्ने स्वच्छ पूर्वाधार लगानी शुल्क र मूल्य अभिवृद्धि कर (भ्याट) पूर्ण रूपमा छुट दिने निर्णय गरेको छ ।

सरकारले पोर्चुगल सरकारलाई काठमाडौँमा कन्सुलर कार्यालय खोल्न सहमति दिने निर्णयसमेत गरेको छ । बैठकले वैदेशिक रोजगार बोर्डको कार्यकारी निर्देशक पदमा बाराका निर्मलकुमार उप्रेतीलाई नियुक्त गर्ने निर्णय गरेको प्रवक्ता पोखरेलले जानकारी दिए । त्यस्तै पूर्वमहालेखापरीक्षक टङ्कमणि शर्मा दङ्गालको संयोजकत्वमा गठित एनसेलको सेयर खरिद–बिक्रीसम्बन्धी अध्ययन तथा छानबिन प्रतिवेदन, २०८० सार्वजनिक गर्ने निर्णयसमेत मन्त्रिपरिषद् बैठकले गरेको छ ।

चारबुँदे सहमतिपछि आमरण अनशन तोडियो
सुनसरीको देवानगञ्ज घटनाका पीडितलाई न्याय, हिन्दु हितको संरक्षण तथा सुरक्षा व्यवस्थाको माग गर्दै आमरण अनशनमा बसेका राष्ट्रिय एकता दलका अध्यक्ष विनय यादवले अनशन स्थगित गरेका छन् । सरकारसँग चारबुँदे लिखित सहमति भएपछि यादवले तत्कालका लागि आमरण अनशन स्थगित गरेका हुन् ।

यादव साउन १४ गतेदेखि काठमाडौँको माइतीघर मण्डलामा आमरण अनशनमा बसेका थिए । देवानगञ्ज गाउँपालिका–३ कप्तानगञ्जमा भएको घटनाका पीडितलाई न्याय, दीर्घकालीन नीतिगत स्पष्टता तथा सुरक्षा व्यवस्थाको माग गर्दै उनले सरकारसमक्ष छ बुँदे माग अघि सारेका थिए ।

राष्ट्रिय एकता दलका केन्द्रीय सदस्य मानिष पूर्वेद्वारा जारी विज्ञप्तिमा सरकारसँग अध्यक्ष यादवले अघि सारेका मागका विषयमा चारबुँदे लिखित सहमति भएपछि तत्कालका लागि आमरण अनशन स्थगित गरिएको उल्लेख छ । दलले सुनसरी घटनाका पीडित तथा प्रभावित परिवारका पक्षमा सरकारले गरेको प्रतिबद्धताअनुसार यथाशीघ्र काम अघि बढ्ने विश्वास व्यक्त गरेको छ । साथै, हिन्दु धर्म, संस्कृति र पहिचानको संरक्षणका लागि आवश्यकता अनुसार आगामी दिनमा पनि आन्दोलन जारी राख्ने जनाएको छ ।

यादवले कुमारी कन्याको हातबाट जुस पिएर आमरण अनशन स्थगित गरेका थिए । १३ दिनसम्म आमरण अनशनमा बसेका यादवको स्वास्थ्य अवस्था कमजोर बन्दै गएपछि सरकारसँगको सहमतिपछि अनशन स्थगित गरिएको दलले जनाएको छ ।