वीरगंज (पर्सा), २६ साउन । वीरगंजस्थित नारायणी अस्पतालमा सर्पदंशका बिरामीलाई दिइने एन्टी स्नेक भेनम (एएसभी) इन्जेक्सनको मौज्दात सकिएपछि उपचार प्रभावित भएको छ । अस्पतालमा सोमबारदेखि नै एएसभी उपलब्ध नभएपछि सर्पले टोकेर आउने बिरामीलाई अन्य अस्पताल तथा उपचार केन्द्रमा पठाउन थालिएको छ ।
अस्पताल प्रशासनले सोमबार सूचना जारी गर्दै एएसभी इन्जेक्सनको मौज्दात सकिएको र सम्बन्धित कार्यालयबाट आपूर्ति हुन नसकेको जनाएको छ । साथै, उपचारमा परेको असुविधाप्रति बिरामी तथा आफन्तसँग क्षमासमेत मागेको छ । नारायणी अस्पतालको आकस्मिक कक्षमा कार्यरत स्वास्थ्यकर्मी प्रहलाद प्रसाद साहका अनुसार अस्पतालमा दैनिक औसत ७ देखि ८ जना सर्पदंशका बिरामी उपचारका लागि आउने गरेका छन् ।
अस्पतालमा भेनमको मौज्दात घट्दै गएपछि यसअघि प्रदेश स्वास्थ्य आपूर्ति व्यवस्थापन केन्द्र, जनकपुरको निर्देशनमा पर्साको ठोरी, बाराको निजगढ, कौल्हबी र सर्लाहीको नवलपुरलगायतका सर्पदंश उपचार केन्द्रबाट एएसभी ल्याएर उपचार सञ्चालन गरिएको थियो ।
यसैविच पर्सा निर्वाचन क्षेत्र नम्बर २ का प्रतिनिधी सभा सदस्य सुशील साह कानुले वीरगंजस्थित नारायणी अस्पतालमा एन्टिस्नेक भेनम इन्जेक्सनको अभाव बारे स्वास्थ्य मन्त्रालयसँग समन्वय गरेका छन् । सांसद कानुले मधेस प्रदेश स्वास्थ्य निर्देशनालयमार्फत आवश्यक एन्टिस्नेक भेनम नारायणी अस्पतालमा पठाउने व्यवस्था मिलाइएको जानकारी दिएका छन् । सर्पदंशका बिरामीको उपचारमा अत्यावश्यक औषधिको अभाव हुन नदिन सम्बन्धित निकायसँग निरन्तर समन्वय तथा सहजीकरण गरिरहेको सांसद कानुले बताए ।
प्रतिक्रिया दिनुहोस् !