देवाहीगोनाही (रौतहट), २६ साउन । रौतहटको देवाही गोनाही नगरपालिका–२ लक्ष्मिनियास्थित लालबकैया नदीमा नुहाउन गएका तीन बालबालिका मंगलबार दिउँसोदेखि बेपत्ता भएका छन् । नदीमा नुहाउने क्रममा दिउँसो करिब १ः५० बजे तीनै जना डुबेर बेपत्ता भएको खबर पाएपछि सुरक्षाकर्मी घटनास्थल पुगेका थिए ।
बेपत्ता हुनेमा स्थानीय शेख अमरे आलमका १० वर्षीय छोरा मोहम्मद रमतुल्लाह, शेख खुरौसेदकी १० वर्षीया छोरी रौशन खातुन र शेख ओसि अख्तरकी १० वर्षीया छोरी सवनम खातुन रहेका छन् । घटनापछि सशस्त्र प्रहरी बल, नेपाल सुरक्षा वेश देवाहीबाट सशस्त्र प्रहरी सहायक निरीक्षक भक्तबहादुर शाहीको कमान्डमा सात जना र इलाका प्रहरी कार्यालय देवाही गोनाहीबाट प्रहरी निरीक्षक तेजप्रसाद भट्टराईको कमान्डमा १६ जनाको टोली खोजीमा खटिएको छ ।
सामान्य खोजीबाट बालबालिका फेला नपरेपछि उद्धार कार्यलाई थप प्रभावकारी बनाउन सशस्त्र प्रहरी बल, नेपाल नं. ११ गण हेडक्वार्टर रौतहटबाट सशस्त्र प्रहरी सहायक निरीक्षक भीमबहादुर पुनको कमान्डमा नौ सदस्यीय डाइभिङ तथा उद्धार टोली रबर बोटसहित घटनास्थलतर्फ पठाइएको छ ।
बालबालिका बेपत्ता भएपछि घटनास्थलमा परिवारजनको रुवाबासी चलेको छ । सुरक्षाकर्मीसँगै स्थानीय बासिन्दासमेत नदीमा बालबालिकाको खोजीमा जुटेका छन् । लालबकैया नदीमा पानीको बहाव र गहिराइ बढी भएकाले खोजी कार्यमा कठिनाइ भइरहेको प्रहरीले जनाएको छ । बेपत्ता तीनै बालबालिकाको खोजी तथा उद्धार कार्य जारी रहेको प्रहरीले जनाएको छ ।
प्रतिक्रिया दिनुहोस् !