बोदेबरसाईन (सप्तरी), २६ साउन । तस्करीबाट बरामद भएको सामान कानुनी प्रक्रिया पूरा नगरी छाड्न अस्वीकार गरेपछि सप्तरी प्रहरीलाई बद्नाम गराउने उद्देश्यले केही तस्कर समूह सक्रिय भएको पाइएको छ । प्रहरीले नियन्त्रणमा लिएको तस्करीको सामान र त्यसको ढुवानीमा प्रयोग भएको मोटरसाइकल छुटाउन विभिन्न माध्यमबाट दबाब आएपनि प्रहरी त्यसबाट पछि नहटेपछि प्रहरीविरुद्ध भ्रमपूर्ण समाचारसहितका प्रचार र अफवाह फैलाउने प्रयास भएको प्रहरीको दाबी छ ।
सप्तरीको ‘बोदेबरसाइन नगरपालिका–५’ स्थित प्रहरीले भन्सार छली गरी भारतबाट नेपालतर्फ ल्याइँदै गरेको मोबाइलका पार्टपुर्जासहित एउटा मोटरसाइकल नियन्त्रणमा लिएपछि यो विवाद सतहमा आएको हो । साउन १८ गते शंकास्पद अवस्थामा रहेको मोबाइलका पार्टपुर्जा र ती सामग्री ओसारपसारमा प्रयोग भएको मोटरसाइकल प्रहरीले नियन्त्रणमा लिन खोज्दा तस्करहरु मोटरसाइकलसहितको सामान छाडेर फरार भएका थिए । तस्कर फरार भएपछि प्रहरीले बरामद सामग्रीलाई आवश्यक मुचुल्कासहित नियन्त्रणमा लिएर कानुनी प्रक्रिया अघि बढाएको जनाएको छ । तर, सामान र मोटरसाइकल छुटाउन केही व्यक्तिहरू प्रहरी कार्यालयसम्म पुगेको तथा विभिन्न व्यक्तिबाट पटक–पटक फोनमार्फत दबाबसमेत आउँदा प्रहरी सामान नछाडेपछि प्रहरी विरुद्ध अफवाह फैलाउने कार्य गरिएको बताइएको छ ।
प्रहरीका अनुसार बरामद मोबाइलका पार्टपुर्जा ‘सुनिल मण्डल’ को भएको प्रारम्भिक जानकारी प्राप्त भएको थियो । घटनापछि मण्डल भने फरार रहेको बताइएको छ । यता, बरामद सामग्री छुटाउन देव यादव प्रहरी कार्यालय पुगेका थिए । तर उनलाई ‘प्रहरीले समातेर पछि छाडेको’ भनेर अफवाह तस्कर समूहले फैलाउन थाले । यादव सामान छुटाउन प्रहरी कार्यालय गएपनि उक्त सामान आफ्नो नभएको बताएपछि प्रहरीले सामान नछोडी यादवलाई फर्काएका थिए ।
जिल्ला प्रहरी कार्यालय सप्तरीका प्रमुख ‘एसपी रुपक खड्का’का अनुसार प्रहरीले व्यक्तिको दबाब वा दाबीका आधारमा नभई प्रमाण र कानुनी प्रक्रियाका आधारमा मात्रै निर्णय गरिरहेको छ । यादवले समेत आफू उक्त घटनामा संलग्न नरहेको तथा बरामद सामग्री आफ्नो नभएको बयान दिएको प्रहरीले जनाएको छ । आवश्यक सोधपुछका क्रममा उनको संलग्नता पुष्टि हुने आधार नदेखिएपछि उनलाई छाडिएको सप्तरी प्रहरीको भनाई छ । तर, बरामद मोबाइलका पार्टपुर्जा र मोटरसाइकल भने प्रहरीले छाडेको छैन । कानुनी प्रक्रिया अगाडि बढिसकेकाले प्रमाणका रूपमा नियन्त्रणमा रहेका सामग्रीलाई आफूखुसी फिर्ता गर्न नमिल्ने प्रहरीको स्पष्ट अडान छ ।
एस.पी. खड्काले प्रहरीले बरामद भएको वास्तविक सामग्री मात्रै मुचुल्कामा उल्लेख गरेको र कानुनी प्रक्रिया पूरा नगरी कुनै पनि सामान छाड्न नसकिने बताए । उनका अनुसार बरामद सामग्री र त्यसलाई ओसारपसारमा प्रयोग गरिएको मोटरसाइकल सम्बन्धित भन्सार कार्यालयमा बुझाइसकिएको छ । प्रहरीका अनुसार सामान छुटाउन दबाब दिने प्रयास असफल भएपछि केही समूहले प्रहरीमाथि नै प्रश्न उठाउने, भ्रम सिर्जना गर्ने तथा नकारात्मक प्रचार गर्ने गतिविधि सुरु गरेको देखिएको छ । प्रहरीको दाबीअनुसार तस्करीमा संलग्न समूहका व्यक्तिहरूले आफ्नो स्वार्थ पूरा नभएपछि प्रहरीको कार्यशैलीमाथि गलत सूचना प्रवाह गर्ने प्रयास गरेका हुन् ।
यस घटनामा केही स्थानीय पत्रकारसमेत तस्करीसँग जोडिएका व्यक्तिहरूको पक्षमा सक्रिय भएको पाइएको छ । प्रहरी स्रोतका अनुसार बरामद सामान फिर्ता गराउन खोज्ने समूहको प्रयास असफल भएपछि प्रहरीविरुद्ध विभिन्न किसिमका अफवाह फैलाइएको हो । पछिल्लो समय सप्तरीका विभिन्न सीमावर्ती क्षेत्रबाट प्रहरीले लागूऔषध, गाँजालगायत तस्करीसँग सम्बन्धित सामग्री नियन्त्रणमा लिने क्रम बढाएको जनाएको छ । यही क्रममा मोबाइलका पार्टपुर्जा बरामद भएको घटनालाई अतिरञ्जित बनाएर प्रहरीको ध्यान अन्य तस्करीका घटनाबाट मोड्ने प्रयास भएको हुनसक्ने प्रहरी स्रोतको आकलन छ ।
सीमावर्ती जिल्लाका रूपमा सप्तरीमा भारतबाट भन्सार छली गरी विभिन्न वस्तु नेपाल भित्र्याउने प्रयास हुँदै आएको छ । यस्तो गतिविधि नियन्त्रण गर्न प्रहरीले सीमाक्षेत्रमा निगरानी बढाउँदै आएको जनाएको छ । प्रहरीका अनुसार भन्सार छलीबाट हुने कारोबार नियन्त्रण गर्नु प्रहरी, भन्सार प्रशासन र अन्य सुरक्षा निकायको कानुनी दायित्व भएकाले बरामद सामग्रीलाई प्रक्रिया पूरा नगरी छाड्ने प्रश्नै उठ्दैन । प्रहरीले बरामद भएको मोबाइलका पार्टपुर्जा र मोटरसाइकललाई सम्बन्धित निकायमा बुझाइसकेको अवस्थामा अब यसको स्वामित्व, ओसारपसारको उद्देश्य तथा भन्सार छली भएको वा नभएको विषयमा सम्बन्धित निकायबाट थप अनुसन्धान हुने जनाएको छ ।
प्रहरीले घटनामा संलग्न व्यक्तिको पहिचान र भूमिकासमेत प्रमाणका आधारमा निर्धारण गरिने स्पष्ट पारेको छ । कुनै व्यक्तिको नाम जोडिँदैमा वा दबाबका आधारमा दोषी ठहर गर्नेभन्दा प्रमाणका आधारमा अनुसन्धान अघि बढाउने नीति रहेको एसपी खड्काको भनाइ छ । प्रहरीमाथि अफवाह फैलाइएको दाबीका विषयमा पनि प्रहरीले कानुनी आधारबिना गरिएको प्रचारलाई आफूहरूले अनुसन्धानको काम प्रभावित पार्ने प्रयासका रूपमा लिएको जनाएको छ । प्रहरीको भनाइमा, बरामद सामग्री नछाडेकै कारण आफूहरूमाथि गलत प्रचार गरिनु कानुनी प्रक्रिया कमजोर पार्ने प्रयास हुनसक्छ ।
अहिले बरामद मोबाइलका पार्टपुर्जा, मोटरसाइकल तथा घटनासँग सम्बन्धित व्यक्तिहरूबारे थप अनुसन्धान भइरहेको छ । प्रहरी उपरीक्षक खड्काले अनुसन्धानका लागि छानविन समिति गठन भएकोले समितिको प्रतिवेदनले घटनाको सत्य तथ्य बाहिर आउने बताए । तस्करी नियन्त्रणका क्रममा बरामद सामग्रीमाथि कुनै पनि किसिमको दबाब वा प्रभावका आधारमा सम्झौता नगर्ने प्रहरीको अडानले सप्तरीमा सीमापार अवैध कारोबार नियन्त्रणलाई थप कडाइ गर्ने संकेत दिएको छ । बरामद वस्तु कानुनी प्रक्रियामा गइसकेपछि फिर्ता गर्न अस्वीकार गरिएको घटनाले तस्करी नियन्त्रणमा प्रहरीको भूमिकामाथि उठेका प्रश्नभन्दा पनि बरामद सामान छुटाउन भएको भनिएको दबाब र त्यसपछि सुरु भएको प्रचारबाजीलाई मुख्य विषय बनाएको छ ।
प्रतिक्रिया दिनुहोस् !