वीरगंज (पर्सा), २४ साउन । पर्सा र बारामा खाना पकाउने एलपी ग्यासको अभाव अझै हट्न सकेको छैन । ग्यास लिन वीरगंजका विभिन्न बिक्री केन्द्र तथा डिलरमा उपभोक्ताको लामो भीड लाग्ने गरेको छ । घण्टौँसम्म लाइनमा बसेपछि मात्र सिलिन्डर पाउने अवस्था रहेको उपभोक्ताहरूले बताएका छन् । वीरगंज बजारमा ‘मनोज, बारा, सुपर, नारायणी’ लगायत विभिन्न कम्पनीका एलपी ग्यास सहज रूपमा उपलब्ध हुन नसक्दा उपभोक्ता थप समस्यामा परेका छन् । नियमित रूपमा घरघरमै डिलरमार्फत ग्यास पुग्ने गरेकोमा अहिले भने सिलिन्डर लिन उपभोक्ता आफैं बिक्री केन्द्रसम्म धाउनुपर्ने अवस्था आएको छ ।
ग्यासको अभाव बढेपछि पर्सामा कालोबजारी तथा कृत्रिम अभाव सिर्जना गरिएको हुन सक्ने आशंकासमेत गरिएको छ । स्थानीय प्रशासनले सम्भावित कालोबजारी नियन्त्रण तथा वास्तविक अवस्था बुझ्न बजार अनुगमनलाई निरन्तरता दिँदै आएको छ । सरकारले आपूर्ति सहज बनाउने प्रयास गरिरहेको बताए पनि सर्वसाधारणले भने अझै सहज रूपमा एलपी ग्यास पाउन सकेका छैनन् । ग्यास विक्रेता संघ पर्साका अध्यक्ष वीरेन्द्र साहले कम्पनीबाट बजार र डिलरहरूमा ग्यास आपूर्ति भइरहे पनि मागको तुलनामा आपूर्ति पर्याप्त हुन नसक्दा समस्या कायमै रहेको बताए ।
मुक्तिनाथ सप्लायर्स एण्ड सन्सका सञ्चालकसमेत रहेका साहका अनुसार पहिले एउटा खेपमा करिब ६० वटा भरिएका सिलिन्डर आउने गरेकामा अहिले ७० वटासम्म सिलिन्डर आउने गरेको छ । तर आपूर्ति परिमाण केही बढेपनि उपभोक्ताको माग अत्यधिक भएकाले बिक्रीको अवस्था असामान्य बनेको उनको भनाइ छ । ‘पहिलाभन्दा अहिले सप्लाई बढी भएपनि ग्यासको अभाव कायमै छ । ग्राहकहरूले घरमा ग्यास रहेको सिलिन्डरसमेत स्टक गरेर राखेकाले पनि अभाव देखिएको हो,’ साहले भने । उनका अनुसार पहिले एउटा खेपमा आएको ग्यास करिब दुई दिनसम्म बिक्री गर्न पुग्ने गरेको थियो । अहिले भने ग्यास बोकेको गाडी बिक्री केन्द्रमा आइपुग्नासाथ उपभोक्ताले सिलिन्डर लैजाने अवस्था छ । यसले बजारमा आपूर्ति र मागबीचको असन्तुलन झनै स्पष्ट पारेको छ ।
साहले ग्यासको अभाव कम गर्न उपभोक्तालाई आवश्यकताअनुसार मात्रै सिलिन्डर खरिद गर्न आग्रह गरेका छन् । एकपटक ग्यास लिइसकेका उपभोक्ताले कम्तीमा १० दिनपछि मात्रै अर्को सिलिन्डर लिनुपर्ने व्यवस्था अपनाउन सके सबैलाई ग्यास उपलब्ध गराउन सहज हुने उनको भनाइ छ । उनले घरमा मौज्दात रहेको अवस्थामा पनि पुनः सिलिन्डर लिन खोज्ने प्रवृत्तिले वास्तविक रूपमा ग्यास आवश्यक परेका उपभोक्ता समस्यामा परेको बताए । ‘आवश्यकताअनुसार मात्रै ग्यास खरिद गरौँ, अरू उपभोक्ताले पनि पाउने अवसर दिऔँ,’ उनको आग्रह छ ।
यसैबीच, ग्यास अभावको मौका छोपेर कालोबजारी वा कृत्रिम अभाव सिर्जना गरिएको भए त्यसलाई नियन्त्रण गर्न स्थानीय प्रशासनको अनुगमन अझ प्रभावकारी बनाउनुपर्ने मागसमेत उठेको छ । एकातिर कम्पनीबाट आपूर्ति भइरहेको दाबी छ भने अर्कोतर्फ उपभोक्ता घण्टौँ लाइनमा बस्नुपर्ने अवस्था छ । यसले बजारमा ग्यासको वास्तविक आपूर्ति, वितरण प्रणाली र उपभोक्तासम्म पुग्ने प्रक्रियामै प्रश्न खडा गरेको छ । सरकारले आपूर्ति बढाउने प्रयाससँगै वितरणमा देखिएको असन्तुलन, अनावश्यक स्टक तथा सम्भावित कालोबजारीमाथि प्रभावकारी निगरानी गर्न सके मात्रै पर्सा–बाराका उपभोक्ताले ग्यासका लागि घण्टौँ लाइन बस्नुपर्ने बाध्यता अन्त्य हुने देखिन्छ ।
प्रतिक्रिया दिनुहोस् !