वीरगंज (पर्सा), २४ साउन । वीरगंजबाट प्रकाशन हुदैं आएको प्रतीक दैनिकले प्रदान गर्दै आएको सुबोध स्मृति पत्रकारिता पुरस्कार यस वर्ष वीरगंजका पत्रकार महेशचन्द्र गौतमलाई प्रदान गरिने भएको छ । प्रतीक दैनिकको सम्पादक मण्डलको बैठकले पत्रकारिता क्षेत्रमा गौतमले पुर्याएको योगदानको कदर गर्दै उक्त पुरस्कार प्रदान गर्ने निर्णय गरेको हो ।
प्रतीक प्रकाशन समूहको ४०औं वार्षिकोत्सवको अवसरमा आगामी भदौ १ गते आयोजना हुने समारोहमा गौतमलाई ५१ हजार रुपैयाँ नगद राशीसहितको सुबोध स्मृति पत्रकारिता पुरस्कार प्रदान गरिने जनाइएको छ । यसैगरी, प्रतीक दैनिकले गत वर्षदेखि प्रदान गर्न थालेको स्वर्गीय चिरञ्जीवी कोइराला पत्रकारिता पुरस्कार यस वर्ष अर्जुन चौधरीलाई प्रदान गर्ने निर्णय गरेको छ । १५ हजार रुपैयाँ राशिको उक्त पुरस्कार पनि वार्षिकोत्सव समारोहकै अवसरमा प्रदान गरिनेछ ।
यसैगरी, प्रतीक दैनिकले स्तम्भकार राजेन्द्र कोइरालालाई स्तम्भकार पुरस्कार प्रदान गर्ने निर्णय गरेको छ । यसैगरि, सम्बाददाताहरू मध्येमा प्रतीक दैनिकका ठोरी संवाददाता चिरञ्जीवी सापकोटा र कर्मचारी तर्फ सहायक मेशीन अपरेटर विजय श्रेष्ठलाई वार्षिकोत्सव समारोहमा पुरस्कृत गरिने जनाइएको छ ।
प्रतिक्रिया दिनुहोस् !