वीरगंज (पर्सा), २४ साउन । जेन–जी पर्साको टोलीले जिल्ला ट्राफिक प्रहरी कार्यालय, पर्साका प्रमुख दीपेन्द्र श्रेष्ठसँग भेटघाट गरी वीरगंज तथा पर्सा जिल्लाको ट्राफिक व्यवस्थापन र सडक सुरक्षासम्बन्धी विषयमा छलफल गरेको छ । वीरगंजका विभिन्न स्थानमा सडकसीमा विस्तार तथा भत्काउने कार्य भइरहेकाले सवारीसाधन र सर्वसाधारणको आवागमनमा पर्न सक्ने समस्या न्यूनीकरण गर्दै प्रभावकारी ट्राफिक व्यवस्थापन गर्ने विषयमा छलफल भएको हो ।
सडक निर्माण भइरहेको स्थानमा ठूला सवारीसाधनको आवागमनलाई व्यवस्थापन गर्ने, जोखिमयुक्त स्थानमा सावधानी अपनाउने तथा सम्भावित सडक दुर्घटना न्यूनीकरणका लागि आवश्यक उपाय अवलम्बन गर्नुे विषयमा छलफल भएको छ । सो अवसरमा जिल्ला ट्राफिक प्रहरी कार्यालय, पर्साका प्रमुख प्रहरी निरिक्षक दीपेन्द्र श्रेष्ठले नागरिकको सहज र सुरक्षित आवागमनका लागि आवश्यक समन्वय एवं ट्राफिक व्यवस्थापनमा ध्यान दिने प्रतिबद्धता व्यक्त गरेका थिए ।
जिल्ला ट्राफिक प्रहरी कार्यालय वीरगंजमा भएको छलफलमा जेन–जी पर्साका संयोजक विशेष साह, लालबाबु यादव, रवि चौरसिया, सागर सहनी, शिव पटेल, सुशील पटेललगायतको सहभागिता थियो ।
प्रतिक्रिया दिनुहोस् !