वीरगंज (पर्सा), २४ साउन । वीरगंजमा खाना पकाउने ग्यासको अभाव देखिएपछि पर्साका प्रमुख जिल्ला अधिकारी भोला दाहालको नेतृत्वमा शनिबार बजार अनुगमन गरिएको छ । अनुगमनका क्रममा अधिकांश डिलरमा भरिएका ग्यास सिलिन्डरको मौज्दात न्यून देखिएपनि डिलर तथा गोदाममा ठूलो संख्यामा खाली सिलिन्डर मौज्दात रहेको भेटिएको छ ।
डिलर सञ्चालकहरूले कम्पनीबाट पर्याप्त मात्रामा ग्यास नआएकाले बजारमा अभाव भएको बताएका थिए । डिलरहरूको भनाइअनुसार उद्योगले समयमा ग्यास उपलब्ध नगराउँदा उपभोक्ताको मागअनुसार वितरण गर्न नसकिएको हो । यता ग्यास उद्योगहरूले भने आफूसँग पर्याप्त खाली सिलिन्डर नभएकाले डिलरबाट खाली सिलिन्डर संकलन हुन नसकेको र सोही कारण समयमा ग्यास भरेर पठाउन नसकिएको बताउँदै आएका छन् । तर अनुगमनका क्रममा एउटा डिलरमा मात्रै ४८० वटा खाली ग्यास सिलिन्डर मौज्दात रहेको भेटिएको छ । वीरगंजका अन्य डिलर तथा गोदाममा समेत कम्तिमा १०० र ५० वटासम्म खाली सिलिन्डर रहेको अनुगमन टोलीले फेला पारेको छ ।
टोलीमा सहायक प्रमुख जिल्ला अधिकारी दयाकृष्ण थापा र कृष्णप्रसाद चापागाईं, जिल्ला प्रहरी कार्यालय पर्साका प्रहरी नायब उपरीक्षक राजु कार्की, नेपाल आयल निगम वीरगंजका प्रमुख मोहनकुमार साह, गुणस्तर तथा नापतौल कार्यालयका प्रतिनिधि, वाणिज्य, आपूर्ति तथा उपभोक्ता संरक्षण कार्यालय वीरगंजका मधुलेश साह, उपभोक्ता संरक्षण मञ्च नेपालका केन्द्रीय सदस्य अजित भुजेल तथा ग्यास बिक्रेता संघ पर्साका अध्यक्ष वीरेन्द्र साहलगायतको सहभागिता थियो ।
उक्त टोलीले वीरगंजस्थित सीडीओ कार्यालय पछाडि, बनारसी चोक, रानीघाट, श्रीपुर, ओमआश्रम, पानीटंकी, रेशमकोठी, ६ नम्बर गेटलगायतका क्षेत्रमा रहेका ग्यास डिलरमा पुगेर मौज्दात तथा आपूर्ति अवस्थाबारे जानकारी लिएको थियो । उद्योगले ‘खाली सिलिन्डरको अभाव’ देखाउने तर डिलर तथा गोदाममा सयौं खाली सिलिन्डर थुप्रिएको भेटिएपछि ग्यासको आपूर्ति व्यवस्थापनप्रतिको प्रश्न अलि पेचिलो बनेको छ । बजारमा देखिएको अभाव वास्तविक आपूर्ति समस्या हो वा वितरण प्रणालीमा भएको कमजोरीका कारण कृत्रिम अभाव सिर्जना भएको हो भन्ने विषयमा समेत अनुगमनले चासो बढाएको छ ।
यता ग्यास नपाएपछि उपभोक्ताहरू भने डिलर–डिलर धाउन बाध्य छन् । ग्यास पाइने आशामा विभिन्न डिलरमा पुगेका उपभोक्तामध्ये कतिपय ग्यास नपाएर रित्तै फर्किनुपर्ने अवस्थो छ । नेपाल सरकारले विगतकै अनुपातमा ग्याँस आपुर्ति भइरहेको बताइरहँदा समस्या उद्योग तर्फबाट हो या विक्रेताबाट सृजना भएको हो भन्ने बारे गहन अध्यायन र कारवाईको जरुरी देखिएको छ ।
प्रतिक्रिया दिनुहोस् !