जनकपुरधाम (धनुषा), २३ साउन । मधेश प्रदेशको मुख्यमन्त्री तथा मन्त्रिपरिषद्को कार्यालय परिसरमा दुग्ध विकास संस्थान (डीडीसी)ले दुग्धजन्य सामग्री बिक्री–वितरणका लागि स्टल सञ्चालन गर्ने तयारी थालेको छ । डीडीसीको दुग्ध विकास आयोजना ढल्केवर शाखाका प्रमुख दिनेश जोशीका अनुसार स्टल सञ्चालनका विषयमा मुख्यमन्त्री तथा मन्त्रिपरिषद्को कार्यालयसँग छलफल सम्पन्न भइसकेको छ । आगामी एक सातादेखि १० दिनभित्र स्टल सञ्चालनमा ल्याउने तयारी भइरहेको उनले बताए ।
जोशीका अनुसार मुख्यमन्त्री कार्यालय परिसरमा विभिन्न मन्त्रालय रहेका कारण दैनिक एक हजारभन्दा बढी कर्मचारी तथा सेवाग्राहीको आवतजावत हुने गर्छ । यही सम्भावनालाई मध्यनजर गर्दै स्वदेशी तथा गुणस्तरीय दुग्धजन्य उत्पादन सहज रूपमा उपलब्ध गराउने उद्देश्यले स्टल स्थापना गर्न लागिएको हो । उनले भने, ‘कर्मचारी र सर्वसाधारण गरी दैनिक एक हजारभन्दा बढी मानिसको आवतजावत हुन्छ । स्वदेशी उत्पादनको प्रवद्र्धनसँगै स्वस्थकर खाद्य सामग्री उपलब्ध गराउने उद्देश्यले स्टल राख्न लागिएको हो । कार्यालयसँग आवश्यक छलफल भइसकेको छ ।’
स्टलमार्फत डीडीसीले उत्पादन गर्दै आएको दही, रसभरी, बटर, पनिर, घ्यु, मोही तथा विभिन्न स्वादका आइसक्रिम बिक्री–वितरण गरिने आयोजनाले जनाएको छ । मधेश प्रदेश दुग्ध विकास बोर्डका उपाध्यक्ष डा. शम्भु साहले सरकारी स्वामित्वको डीडीसीका उत्पादन गुणस्तरीय र स्वास्थ्यकर भएकाले कर्मचारी तथा सेवाग्राही दुवैका लागि उपयोगी हुने बताए । उनका अनुसार स्वदेशी उत्पादनको प्रवद्र्धन र प्रोत्साहन गर्ने उद्देश्यले मुख्यमन्त्री कार्यालय परिसरमा स्टल सञ्चालन गर्न लागिएको हो ।
करिब एक महिनाअघि काठमाडौं महानगरपालिकाका प्रमुख बालेन्द्र शाहले सामाजिक सञ्जालमार्फत डीडीसीको चिज प्रयोग गरिरहेको तस्बिर सार्वजनिक गरेपछि डीडीसीका उत्पादनको बिक्री उल्लेखनीय रूपमा बढेको थियो । हाल जनकपुर चुरोट कारखाना परिसरभित्र मुख्यमन्त्री तथा मन्त्रिपरिषद्को कार्यालयसँगै अर्थ, स्वास्थ्य, शिक्षा तथा संस्कृति, भौतिक पूर्वाधार विकास तथा गृह, सञ्चार तथा कानुन मन्त्रालय सञ्चालनमा छन् । यस्तै, आयोजना प्रमुख जोशीका अनुसार ढल्केवर शाखाले सहकारी संस्था र व्यावसायिक फार्ममार्फत दैनिक २ हजार २ सयदेखि २ हजार ५ सय लिटर दूध सङ्कलन गर्दै आएको छ ।
प्रतिक्रिया दिनुहोस् !