जनकपुरधाम (धनुषा), २३ साउन । लेनदेनसम्बन्धी विवाद समाधानका नाममा भएको ९ बुँदे सहमति र मन्त्रिपरिषद्को निर्णयप्रति असन्तुष्टि जनाउँदै साहु–महाजनहरूले जनकपुरधाममा विरोध प्रदर्शन गरेका छन् । पीडित लेनदेन संघर्ष समितिको अगुवाइमा भएको प्रदर्शनमा सहभागीहरूले आफूहरूको हितविपरीत भएका निर्णय तत्काल खारेज गर्न माग गरेका हुन् । उनीहरूले ९ बुँदे सहमति र एकतर्फी रूपमा गरिएको सहमति खारेज गर्नुपर्ने तथा मन्त्रिपरिषद्को निर्णयसमेत फिर्ता लिनुपर्ने माग अघि सारेका छन् ।
मधेशका आठवटै जिल्लाबाट आएका साहु–महाजनहरूले जनकपुरधाम नगर परिक्रमा गर्दै जिल्ला प्रहरी कार्यालय, जिल्ला प्रशासन कार्यालय धनुषा र जिल्ला अदालत धनुषा अगाडि विरोध प्रदर्शन गरेका थिए । पीडित लेनदेन संघर्ष समिति मधेशका अध्यक्ष विजय यादवले सरकारले आफ्ना माग सम्बोधन नगरे भदौ १ गते काठमाडौं पुगेर सिंहदरबार घेराउ गर्ने तथा माइतीघर मण्डलामा धर्ना दिने कार्यक्रम रहेको बताए ।
प्रदर्शनका क्रममा सहभागीहरूले कानुनी राज्यको प्रत्याभूति हुनुपर्ने भन्दै नाराबाजी गरेका थिए। उनीहरूले लेनदेनसम्बन्धी समस्या समाधानका लागि सम्बन्धित सबै पक्षलाई समेटेर त्रिपक्षीय वार्ताको आह्वान गर्न पनि माग गरेका छन् । प्रदर्शनकारीहरूले सम्मानित अदालतबाट भएका फैसला तथा आदेश कार्यान्वयन गर्नुपर्नेमा जोड दिएका छन् । अदालतको फैसला कार्यान्वयन नगरी अन्य सहमति वा मन्त्रिपरिषद्को निर्णयका आधारमा समस्या समाधान गर्न खोजिए आफूहरूलाई स्वीकार्य नहुने उनीहरूको भनाइ छ ।
प्रतिक्रिया दिनुहोस् !