वीरगंज (पर्सा), २३ साउन । पेट्रोलियम पदार्थ बोकेको ट्याङ्करबाट अनधिकृत रूपमा तेल चोरी गरी बिक्री–वितरण गरेको आरोपमा वीरगंज स्थित पेट्रोल पम्पका सञ्चालकसहित सात जनालाई प्रहरीले पक्राउ गरेको छ । पक्राउ पर्नेमा सौदागर आयल सेन्टरका सञ्चालक वीरगंज महानगरपालिका–३ मालपोत चोक निवासी ५५ वर्षीय सुनैन मियाँ, पम्पमा लेखाको काम गर्ने वीरगंज–१५ लक्ष्मणवाका २३ वर्षीय असलम हवारी, पम्पका क्यासियर वीरगञ्ज–११ श्रीपुर निवासी २१ वर्षीय रफिक मियाँ रहेका छन् ।
त्यसैगरी, ना.७ ख २८०४ नम्बरको ट्याङ्करका सहचालक मकवानपुर हेटौंडा उपमहानगरपालिका–११ निवासी २० वर्षीय सन्देश राना मगर, सोही ट्याङ्करका चालक हेटौंडा–१० निवासी ४६ वर्षीय केशर राम सुनार, ना.७ ख १५३९ नम्बरको ट्याङ्करका चालक हेटौंडा–१४ निवासी ५० वर्षीय मन्द सिंह लामा तथा सहचालक हेटौंडा–१४ निवासी २७ वर्षीय उमेश राना मगर पक्राउ परेका छन् ।
प्रहरीका अनुसार बिहीबार साँझ करिब ५ः१० बजे वीरगंज बाइपास स्थित शौदागर आयल सेन्टरमा ना.७ ख १५३९ नम्बरको पेट्रोलियम पदार्थ बोकेको ट्याङ्करमा सिल गरिएको फलामको हुक उचालेर अनधिकृत रूपमा तेल निकालिरहेको अवस्थामा छापा मारेर सात जनालाई नियन्त्रणमा लिइएको हो । प्रहरीले घटनास्थलबाट प्रयोग गरिएको ट्याङ्कर तथा अन्य आवश्यक सामग्री नियन्त्रणमा लिएको जनाएको छ । पक्राउ परेका सातै जनामाथि पेट्रोलियम पदार्थ चोरी तथा सम्बन्धित कसुरमा थप अनुसन्धान भइरहेको प्रहरीले जनाएको छ ।
प्रतिक्रिया दिनुहोस् !