वीरगंज (पर्सा), २१ साउन । पर्सामा जिल्ला प्रहरी कार्यालय र जिल्ला ट्राफिक प्रहरी कार्यालयले संयुक्त रूपमा सञ्चालन गरेको ई-स्कुटी चेकजाँच तथा नियन्त्रण अभियानप्रति स्थानीयवासीले असन्तुष्टि जनाएका छन् । केही दिनअघिसम्म बिना अवरोध नेपाल भित्रिन दिइएका ई–स्कुटीहरू अहिले प्रहरीले नियन्त्रणमा लिन थालेपछि स्थानीयले प्रशासनमाथि दोहोरो मापदण्ड अपनाएको आरोप लगाएका छन् ।
प्रहरीका अनुसार पछिल्लो तीन दिनमा नेपालमा दर्ता नभएका, आवश्यक कागजात नभएका तथा भन्सार प्रक्रिया पूरा नगरी नेपाल भित्रिएका कम्तीमा ४१ वटा ई–स्कुटी नियन्त्रणमा लिइएको छ । नियन्त्रणमा परेका केही स्कुटी भारतका नागरिकका पनि रहेको बताइएको छ, जो विभिन्न कामका सिलसिलामा वीरगंज आएका थिए । जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लले बरामद गरिएका सबै ई–स्कुटी आवश्यक कानुनी कारबाहीका लागि वीरगंज भन्सार कार्यालयमा बुझाइएको जानकारी दिए ।
वीरगंजका स्थानीयवासी भने प्रशासनको कार्यशैलीप्रति असन्तुष्ट देखिएका छन् । उनीहरूका अनुसार लामो समयसम्म सीमा नाकाबाट ई–स्कुटी सहज रूपमा भित्रिन दिइयो, तर अहिले अचानक नियन्त्रण अभियान सञ्चालन गरिनु नागरिकप्रति अन्यायपूर्ण व्यवहार भएको उनीहरूको भनाइ छ ।
प्रतिक्रिया दिनुहोस् !