लहान (सिरहा), २१ साउन । पत्रकारको परिचयपत्र प्रयोग गरी प्रहरीको जाँच छल्दै लागुऔषध ओसारपसार गर्ने गरेको आरोपमा तीन जनालाई प्रहरीले पक्राउ गरेको छ । पक्राउ पर्नेहरूमा सिरहाको लक्ष्मीपुर गाउँपालिकाका २६ वर्षीय उमेशकुमार यादव, लहान नगरपालिका–१० का ३० वर्षीय रमेशकुमार राम तथा लक्ष्मीपुर गाउँपालिका–२ का २५ वर्षीय गुल्सनप्रसाद साह रहेका छन् ।
लागुऔषध नियन्त्रण ब्युरो शाखा कार्यालय बर्दिबासको टोलीले सिन्धुलीको दुधौली नगरपालिका–९ बाट ब्राउन सुगरसहित उनीहरूलाई पक्राउ गरेको हो । लागुऔषध नियन्त्रण ब्युरोका अनुसार मङ्गलबार राति नियमित चेकजाँचका क्रममा बा १६ च ७८४६ नम्बरको कारलाई नियन्त्रणमा लिइएको थियो । कारको गियर बक्सभित्र विशेष रूपमा लुकाएर राखिएको अवस्थामा ४४ ग्राम ३४० मिलिग्राम प्रतिबन्धित लागुऔषध ब्राउन सुगर बरामद भएको प्रहरीले जनाएको छ ।
लागुऔषध नियन्त्रण ब्युरोका प्रमुख प्रहरी वरिष्ठ उपरीक्षक सुवास बोहराका अनुसार पक्राउ परेका चालक उमेशकुमार यादवको साथबाट सिरहाको लहान–२२ ठेगाना उल्लेख भएको ‘जनजागरण खबर’ नामक सञ्चारमाध्यमको पत्रकार परिचयपत्रसमेत बरामद भएको छ ।
प्रतिक्रिया दिनुहोस् !