वीरगंज (पर्सा), २१ साउन । जिल्ला प्रशासन कार्यालय पर्साले एलपी ग्यासको आपूर्ति, बिक्री तथा वितरणलाई सहज, नियमित र पारदर्शी बनाउन अत्यन्त जरुरी सूचना जारी गरेको छ ।
पर्साका सहायक प्रमुख जिल्ला अधिकारी कृष्ण थापाद्वारा जारी सूचना अनुसार बजारमा कृत्रिम अभाव सिर्जना गर्ने, कालोबजारी गर्ने वा तोकिएको मूल्यभन्दा बढीमा ग्यास बिक्री–वितरण गरिएको भन्ने गुनासोप्रति प्रशासनको गम्भीर ध्यानाकर्षण भएको जनाइएको छ । प्रशासनले सम्बन्धित सबै ग्यास व्यवसायीलाई अनिवार्य रूपमा बिल वा रसिदसहित तोकिएको मूल्यमा मात्रै ग्यास बिक्री–वितरण गर्न निर्देशन दिएको छ ।
कृत्रिम अभाव सिर्जना गर्ने, मूल्यवृद्धि गर्ने, कालोबजारी गर्ने वा उपभोक्ता हितविपरीतका गतिविधि गरेको पाइएमा कालोबजार तथा केही अन्य सामाजिक अपराध तथा सजाय ऐन, २०३२ र उपभोक्ता संरक्षण ऐन, २०७५ अनुसार कडा कारबाही गरिने चेतावनी दिइएको छ ।
यसैगरि जिल्ला प्रशासन कार्यालय बाराले कलैयास्थित ग्यास पसलहरूमा छड्के अनुगमन गरेको छ । नायब सुब्बा रत्नबहादुर स्याङतानको नेतृत्वमा खटिएको अनुगमन टोलीले कलैयाका न्यु शिवशक्ति स्टोर्स, सोना ग्यास स्टोर्स र अस्मिता स्टोर्समा स्थलगत निरीक्षण गरेको थियो ।
अनुगमनका क्रममा न्यु शिवशक्ति स्टोर्सले ग्यास सिलिन्डर पल्टी गरेर खुद्रा बिक्री गरिरहेको भेटिएको प्रशासनले जनाएको छ । त्यसैगरी, सोना ग्यास स्टोर्सले बिक्रीका लागि राख्नुपर्ने ग्यास सिलिन्डर पसलमा नराखी निजी घरमा भण्डारण गरेको पाइएपछि प्रशासनले सिलिन्डर पसलमै राखी पारदर्शी रूपमा बिक्री–वितरण गर्न निर्देशनसहित चेतावनी दिएको छ ।
यसअघि प्रमुख जिल्ला अधिकारी धर्मेन्द्रकुमार मिश्रले ग्यासको सहज आपूर्ति र न्यायोचित वितरण सुनिश्चित गर्न उत्पादक, वितरक तथा डिलरहरूका लागि ९ बुँदे निर्देशन जारी गरेका थिए । ग्याससम्बन्धी कुनै समस्या वा गुनासो भए सहायक प्रमुख जिल्ला अधिकारीको मोबाइल नम्बर ९८ ५५० ४५ ४०३ मा सम्पर्क गर्न वा ९८ ५५ ००७ ७७८ नम्बरको ह्वाट्सएपमा सन्देश पठाउन प्रशासनले अनुरोध गरेको छ ।
प्रतिक्रिया दिनुहोस् !