वीरगंज (पर्सा), १३ साउन । माउण्ट मकालु इङ्ग्लिस बोर्डिङ्ग स्कूल, असोक वाटिका–१० मा कक्षा ९ का विद्यार्थीहरूले आयोजना गरेको शिक्षक दिवस (गुरु पूर्णिमा) कार्यक्रम भव्य तथा उल्लासपूर्ण वातावरणमा सम्पन्न भएको छ । विद्यालयका प्रधानाध्यापक राहुल श्रीवास्तवको अध्यक्षतामा सम्पन्न कार्यक्रममा विद्यालयका निर्देशक कामेश्वर प्रसाद श्रीवास्तव प्रमुख अतिथि तथा उप–प्रधानाध्यापक रेखा जैशी विशिष्ट अतिथिका रूपमा सहभागी भएका थिए ।
कार्यक्रममा अम्बिका केसी, अम्बिका श्रेष्ठ, चन्दन साह, प्रिया सिंह, सुमन शाह, स्नेहा रौनियार लगायत विद्यालयका सम्पूर्ण शिक्षक–शिक्षिकाहरूको उपस्थिति रहेको थियो । विद्यार्थीहरूले शिक्षकप्रति सम्मान व्यक्त गर्दै सांस्कृतिक प्रस्तुति, कविता वाचन, नृत्य तथा सम्मान कार्यक्रम प्रस्तुत गरेका थिए । विद्यार्थीहरूले आफ्ना गुरुहरूलाई टीका, फूल तथा उपहार अर्पण गरी सम्मान व्यक्त गरेका थिए ।
कार्यक्रममा बोल्दै प्रमुख अतिथि तथा अन्य वक्ताहरूले शिक्षकको भूमिका राष्ट्र निर्माण र विद्यार्थीको भविष्य निर्माणमा अत्यन्त महत्वपूर्ण रहेको उल्लेख गर्दै विद्यार्थीहरूको उज्ज्वल भविष्यको शुभकामना व्यक्त गरेका थिए । कार्यक्रमको अन्त्यमा अध्यक्ष राहुल श्रीवास्तवले सहभागी सबैप्रति धन्यवाद ज्ञापन गर्दै यस्ता कार्यक्रमले विद्यार्थी र शिक्षकबीचको सम्बन्ध अझ सुदृढ हुने विश्वास व्यक्त गरे । विद्यालयका अनुसार विद्यार्थीहरूको सक्रिय सहभागिता र उत्साहले शिक्षक दिवस कार्यक्रम सफल, अनुकरणीय तथा स्मरणीय बनेको छ ।
प्रतिक्रिया दिनुहोस् !