वीरगंज (पर्सा), १३ साउन । वीरगंज महानगरपालिका–१४, पिपरा स्थित सन साइन इंग्लिस बोर्डिङ स्कुलले गुरु पूर्णिमा (शिक्षक दिवस) विविध सांस्कृतिक तथा सम्मान कार्यक्रमका साथ भव्य रूपमा मनाएको छ । विद्यालय परिसरमा आयोजित कार्यक्रममा विद्यार्थीहरूले आफ्ना गुरुहरूप्रति सम्मान प्रकट गर्दै टीका लगाइदिने, फूल तथा उपहार अर्पण गर्ने कार्यक्रम गरेका थिए । साथै गीत, नृत्य, कविता, नाटकलगायत विभिन्न सांस्कृतिक तथा सिर्जनात्मक प्रस्तुति प्रस्तुत गर्दै विद्यार्थीहरूले गुरु–शिष्य सम्बन्धको महत्त्व उजागर गरेका थिए ।
कार्यक्रममा विद्यालयका डाइरेक्टर अमित आलोक, कोअर्डिनेटर दिपक कुमार, शिक्षक–शिक्षिका, विद्यार्थी तथा विद्यालय परिवारको उल्लेखनीय सहभागिता रहेको थियो । कार्यक्रमलाई सम्बोधन गर्दै डाइरेक्टर अमित आलोकले गुरुको सम्मान गर्नु नेपाली संस्कृतिको महत्वपूर्ण पक्ष भएको उल्लेख गर्दै विद्यार्थीहरूलाई अनुशासित, नैतिकवान् र परिश्रमी भई शिक्षामा उत्कृष्टता हासिल गर्न प्रेरित गरे । कोअर्डिनेटर दिपक कुमारले यस्ता कार्यक्रमले विद्यार्थीमा शिक्षकप्रतिको सम्मान, कृतज्ञता, आत्मविश्वास र सिर्जनशीलता अभिवृद्धि गर्न महत्वपूर्ण भूमिका खेल्ने बताए ।
कार्यक्रमको समापनमा विद्यालय परिवारले सहभागी सबै शिक्षक–शिक्षिका, विद्यार्थी तथा कार्यक्रम सफल बनाउन सहयोग पुर्याउने सबैप्रति आभार व्यक्त गरेको थियो । विद्यालयका अनुसार विद्यार्थीहरूको उत्साहपूर्ण सहभागिता र आकर्षक सांस्कृतिक प्रस्तुतिका कारण यस वर्षको गुरु पूर्णिमा कार्यक्रम सफल, स्मरणीय र अनुकरणीय बनेको छ ।
प्रतिक्रिया दिनुहोस् !