वीरगंज (पर्सा), १२ साउन । वीरगंज महानगरपालिका–२६, चक्रदहस्थित निर्माणाधीन पुल नजिकै पानी जमेको खाल्डोमा डुबेर दुई सानी दिदीबहिनीको मृत्यु भएको छ । मंगलबार बिहान एउटै खाल्डोबाट उनीहरू मृत अवस्थामा फेला परेपछि स्थानीय क्षेत्रमा शोक छाएको छ । मृत्यु हुनेमा सोही वडाको सुगौली निवासी प्रभु ठाकुरकी ५ वर्षीया छोरी पुच्की ठाकुर र ३ वर्षीया घघरी ठाकुर रहेका छन् । दुवै बालिका एउटै स्थानमा पानीमा डुबेको अवस्थामा भेटिएको प्रहरीले जनाएको छ ।
प्रहरीका अनुसार सोमबार बिहान दुवै बालिका आफ्ना हजुरबुबा किशोरी ठाकुरसँग खेततर्फ गएका थिए । खेतमा पुगेपछि हजुरबुबाले उनीहरूलाई केहीबेर त्यहीँ बस्न भन्दै हजुरआमालाई बोलाउन गएको बताइएको छ । केही समयपछि फर्केर आउँदा दुवै बालिका खेतबाट हराइसकेका थिए । परिवारका सदस्यले गाउँ तथा आफन्तका घरमा व्यापक खोजी गर्दा पनि उनीहरूको अवस्था पत्ता नलागेपछि बालिकाकी आमा अन्तिमा देवीले सोमबार राति इलाका प्रहरी कार्यालय सुगौलीमा खोजतलासका लागि जानकारी गराएकी थिइन् ।
सूचना प्राप्त भएपछि प्रहरी टोलीले खोजी अभियान तीव्र बनाएको थियो । सोही क्रममा मंगलबार बिहान करिब ६ बजे चक्रदहस्थित निर्माणाधीन पुल नजिकै रहेको पानी भरिएको खाल्डोमा दुवै बालिका डुबेको अवस्थामा मृत फेला परेको पर्साका प्रहरी नायब उपरीक्षक चक्रबहादुर मल्लले जानकारी दिए । प्रहरीले दुवै बालिकाको शव पोस्टमार्टमका लागि नारायणी अस्पताल पठाएको छ । घटनाको वास्तविक कारण खुलाउन आवश्यक अनुसन्धान अघि बढाइएको प्रहरीको भनाइ छ ।
प्रतिक्रिया दिनुहोस् !