वीरगंज (पर्सा), १२ साउन । वीरगंजस्थित नारायणी अस्पतालमा चिकित्सकमाथि भएको आक्रमण र त्यसपछिका घटनाक्रमले नयाँ मोड लिएको छ । उपचार सेवा बहिष्कार गर्दै आन्दोलनमा रहेका अस्पतालका ६५ जना चिकित्सकले सामूहिक रूपमा राजीनामा बुझाएका छन् । अस्पतालका प्रवक्ता डा. उदय नारायण सिंहका अनुसार अस्पतालमा कार्यरत ७० भन्दा बढी चिकित्सकमध्ये ६५ जनाले निमित्त मेडिकल सुपरिन्टेन्डेन्ट (मेसु) डा. चित्तरञ्जन साहसमक्ष सामूहिक राजीनामा पेश गरेका हुन् । सोमबार रातिदेखि मंगलबार दिउँसोसम्म चरणबद्ध रूपमा राजीनामा बुझाइएको उनले जानकारी दिए ।
चिकित्सकहरूका अनुसार सोमबार साँझ जिल्ला प्रशासन कार्यालय पर्सामा प्रमुख जिल्ला अधिकारीको उपस्थितिमा भएको वार्ताका क्रममा पर्साका प्रहरी उपरीक्षक सुदीपराज पाठकले आन्दोलनरत चिकित्सकमाथि धक्कामुक्का र दुर्व्यवहार गरेपछि उनीहरू थप आक्रोशित बनेका हुन् । यही घटनापछि आन्दोलनले अझ उग्र रूप लिँदै चिकित्सकहरूले सामूहिक राजीनामाको निर्णय गरेका हुन् ।
यसअघि गत शनिबार नारायणी अस्पतालको आकस्मिक कक्षमा उपचाररत एक बिरामीको मृत्यु भएपछि अस्पतालमा तोडफोड भएको थियो । सोही क्रममा चिकित्सक डा. प्रमोद राममाथि पनि निर्घात कुटपिट भएको आरोप छ । उक्त घटनामा संलग्न सबैलाई कानुनी दायरामा ल्याई कडा कारबाही गर्नुपर्ने माग राख्दै वीरगञ्जका चिकित्सकहरू आइतबारदेखि उपचार सेवा ठप्प पारेर आन्दोलनमा उत्रिएका छन् ।
सोमबार जिल्ला प्रशासन कार्यालयमा भएको वार्ताका क्रममा आन्दोलनरत चिकित्सकहरूले प्रमुख जिल्ला अधिकारी र पर्साका प्रहरी प्रमुखले पनि नैतिक जिम्मेवारी स्वीकार गर्दै पदबाट राजीनामा दिनुपर्ने माग राखेका थिए । त्यसपछि वार्ता तनावग्रस्त बनेको थियो । वार्ता निष्कर्षविहीन बन्दै चिकित्सकहरू बाहिरिन थालेपछि प्रहरी उपरीक्षक पाठकले उनीहरूलाई धक्कामुक्का गर्दै प्रमुख जिल्ला अधिकारीको कार्यकक्षतर्फ लैजान खोजेको आरोप चिकित्सक पक्षको छ ।
त्यसक्रममा प्रहरी र चिकित्सकबीच फेरि धकेलाधकेल भएको थियो। त्यसपछि चिकित्सकहरूले वार्ता बहिष्कार गर्दै जिल्ला प्रशासन कार्यालय छाडेका थिए । सामूहिक राजीनामासँगै नारायणी अस्पतालको सेवा प्रवाह थप प्रभावित हुने देखिएको छ भने चिकित्सकमाथिको आक्रमण, अस्पतालभित्रको तोडफोड र वार्तास्थलमा भएको भनिएको दुर्व्यवहारप्रति सरकारको भूमिकामाथि समेत गम्भीर प्रश्न उठ्न थालेका छन् ।
प्रतिक्रिया दिनुहोस् !