वीरगंज (पर्सा), ११ साउन । पर्साको सखुवा प्रसौनी गाउँपालिका–१, सिद्धपुरमा मृत अवस्थामा फेला परेकी ३७ वर्षीया लक्ष्मी खड्का सिलवालको मृत्यु शंकास्पद रहेको भन्दै उनका माइती पक्षले निष्पक्ष छानबिन र दोषीमाथि कडा कानुनी कारबाहीको माग गर्दै सोमबार वीरगंजमा प्रदर्शन गरेका छन् । माइती पक्षले घटनालाई आत्महत्या नभई योजनाबद्ध हत्या भएको दाबी गरेको छ ।
पर्साकै ठोरी गाउँपालिका–३, रामनगर माइती भएकी दुई सन्तानकी आमा लक्ष्मी गत शुक्रबार आफ्नै घरछेउको गोठमा झुण्डिएको अवस्थामा मृत फेला परेकी थिइन् । तर उनको शव झुण्ड्याएर आत्महत्याको रूप दिन खोजिएको भन्दै परिवारजनले घटनाप्रति गम्भीर आशंका व्यक्त गरेका छन् । पोस्टमार्टमपछि मृतकको शव चार दिनदेखि नारायणी अस्पतालको शवगृहमै राखिएको छ । माइती पक्षले पोस्टमार्टम प्रतिवेदन नआएसम्म शव नबुझ्ने अडान लिएपछि अन्त्येष्टि प्रक्रिया रोकिएको हो ।
घटनाको सत्यतथ्य सार्वजनिक गर्न र दोषीलाई कानुनअनुसार कडा सजाय दिलाउन माग गर्दै ठोरी गाउँपालिकाबाट आएका महिला, आफन्त तथा स्थानीयवासीले नयाँ बसपार्क चोकदेखि घण्टाघरसम्म नाराबाजीसहित प्रदर्शन गरेका थिए । त्यसपछि उनीहरूले जिल्ला प्रशासन कार्यालय पर्सा पुगेर प्रमुख जिल्ला अधिकारी भोला दाहाललाई ज्ञापनपत्र बुझाएका छन् । ज्ञापनपत्र बुझाउने क्रममा ठोरी गाउँपालिकाकी उपाध्यक्ष गोकुली रेग्मीले लक्ष्मीले आत्महत्या नगरेको दाबी गर्दै उनका पति, सासु र ससुराले कुटपिटपछि हत्या गरेर शव गोठमा झुण्ड्याएको आरोप लगाइन् । घटनामा संलग्न सबैलाई कानुनबमोजिम हदैसम्मको कारबाही गर्न उनले प्रशासनसँग माग गरिन् ।
माइती पक्षले मृतकका पति सुधिर सिलवाल, सासु–ससुरा तथा उनका दिदी र भिनाजुसमेत घटनामा संलग्न रहेको आरोप लगाएको छ । प्रमुख जिल्ला अधिकारीलाई बुझाइएको ज्ञापनपत्रमा अस्पतालबाट तयार गरिएको पोस्टमार्टम प्रतिवेदनप्रति समेत शंका व्यक्त गरिएको छ । उनीहरूले पुनः पोस्टमार्टम गराउन, निष्पक्ष अनुसन्धानका लागि स्वतन्त्र छानबिन समिति गठन गर्न, मृतकको मोबाइल फोन र ब्याग सार्वजनिक गर्न तथा आरोपित सबै व्यक्तिलाई तत्काल पक्राउ गरी अनुसन्धानको दायरामा ल्याउन माग गरेका छन् ।
जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक चक्रबहादुर मल्लका अनुसार घटनाकै दिन मृतकका पति सुधिर सिलवाललाई नियन्त्रणमा लिएर अनुसन्धान अघि बढाइएको छ । सासु र ससुरालाई पनि प्रारम्भिक रूपमा नियन्त्रणमा लिइएको भएपनि वृद्ध अवस्थालाई ध्यानमा राख्दै आफन्तको सहमतिमा तारिखमा छाडिएको उनले जानकारी दिए । डीएसपी मल्लले अस्पतालबाट पोस्टमार्टम प्रतिवेदन हालसम्म प्रहरीलाई प्राप्त नभएको र प्रतिवेदन प्राप्त भएपछि मात्रै मृत्युको वास्तविक कारणबारे स्पष्ट हुन सक्ने बताए । उनका अनुसार घटनाको सबै पक्षलाई समेटेर अनुसन्धान जारी रहेको छ ।
माइती पक्षले हत्या भएको दाबी गर्दै आन्दोलनलाई निरन्तरता दिने चेतावनी दिएको छ भने प्रहरीले पोस्टमार्टम प्रतिवेदन र अनुसन्धानको निष्कर्षपछि मात्रै घटनाको वास्तविकता सार्वजनिक हुने जनाएको छ । यसबीच लक्ष्मी सिलवालको मृत्यु प्रकरणले पर्सामा गम्भीर चासो र बहस सिर्जना गरेको छ ।
प्रतिक्रिया दिनुहोस् !