वीरगंज (पर्सा), २ साउन । पर्साको कालिकामाई गाउँपालिकामा कर्मचारीमाथि भएको भनिएको कुटपिट तथा दुर्व्यवहारको घटनाको निष्पक्ष छानबिन गरी संलग्न दोषीमाथि कानुनबमोजिम कारबाही गर्न स्थानीय राजेशप्रसाद कुर्मीले माग गरेका छन् । शनिबार प्रेस विज्ञप्ति जारी गर्दै उनले २०८३ असार २३ गते कालिकामाई गाउँपालिका कार्यालयमा भएको घटनाप्रति गम्भीर चासो व्यक्त गरेका हुन् ।
विज्ञप्तिमा कालिकामाई गाउँपालिका–३ का वडाध्यक्ष संजयकुमार पटेलको नेतृत्वमा कर्मचारीमाथि कुटपिट तथा दुर्व्यवहार भएको भन्ने आरोपलाई दुःखद, निन्दनीय तथा कानुनी शासनको मूल भावना विपरीतको घटना भएको उल्लेख गरिएको छ । कुर्मीले लोकतान्त्रिक शासन व्यवस्थामा जनप्रतिनिधिसहित सबै नागरिकले कानुनको सीमाभित्र रहेर आफ्ना असन्तुष्टि र अधिकार व्यक्त गर्नुपर्ने उल्लेख गर्दै हिंसात्मक गतिविधि कुनै पनि अवस्थामा स्वीकार्य नहुने बताएका छन् । दोस्रो कार्यकालमा निर्वाचित जनप्रतिनिधिबाट यस्तो व्यवहार देखिनु जनप्रतिनिधिको मर्यादा, जिम्मेवारी र सार्वजनिक उत्तरदायित्वसँग मेल नखाने उनको भनाइ छ ।
विज्ञप्तिमार्फत उनले घटनाको वास्तविक कारण, पृष्ठभूमि र उद्देश्यबारे स्वतन्त्र तथा निष्पक्ष अनुसन्धान गरी सत्यतथ्य सार्वजनिक गर्न सम्बन्धित निकायसँग आग्रह गरेका छन् । कार्यादेशबिनै सम्पन्न गरिएको भनिएको कामको भुक्तानीसम्बन्धी विवादका कारण उक्त घटना भएको चर्चा चलेको उल्लेख गर्दै त्यस विषयको वास्तविकता पनि सार्वजनिक हुनुपर्नेमा उनले जोड दिएका छन् ।
कुर्मीले वडाध्यक्ष पटेललाई आफ्नो कार्यकालमा वडा नं. ३ मा भएका विकास निर्माण, शिक्षा, स्वास्थ्य, सडक, खानेपानी तथा अन्य आधारभूत सेवाका कामको विवरण स्थानीयवासीसमक्ष स्पष्ट रूपमा सार्वजनिक गर्न पनि आग्रह गरेका छन् । गाउँपालिका कार्यालय रहेको वडामै अपेक्षाअनुसार शिक्षा, स्वास्थ्य तथा पूर्वाधार विकास हुन नसकेको विषय गम्भीर समीक्षा गर्नुपर्ने आवश्यकता रहेको उनको धारणा छ ।
त्यसैगरी, हालै सार्वजनिक भएको भिडियोमा उठाइएको करार नियुक्ति तथा तथाकथित ‘बाउन्सर’ भर्नासम्बन्धी विषयमा पनि आफ्नो कार्यकालमा भएका सम्पूर्ण नियुक्ति प्रक्रियाको तथ्य सार्वजनिक गर्न सम्बन्धित पक्षलाई उनले आग्रह गरेका छन् । नेपालमा विधिको शासन, सुशासन र पारदर्शिता सुदृढ बनाउने प्रयास भइरहेका बेला कुनै पनि व्यक्तिले कर्मचारीमाथि दबाब, धम्की वा बल प्रयोग गरी गैरकानुनी काम गराउने वा गराउन खोज्ने प्रवृत्ति अस्वीकार्य हुने उल्लेख गर्दै उनले कानुनको सर्वोच्चता र लोकतान्त्रिक मूल्य–मान्यताको सम्मान गर्न सबै पक्षलाई आह्वान गरेका छन् ।
विज्ञप्तिको अन्त्यमा कुर्मीले कर्मचारीमाथि भएको भनिएको कुटपिट तथा दुर्व्यवहारको घटनाको निष्पक्ष, स्वतन्त्र र प्रभावकारी छानबिन गरी दोषी जोसुकै भएपनि कानुनअनुसार कारबाही गर्न सम्बन्धित निकायसँग पुनः माग गरेका छन् ।
प्रतिक्रिया दिनुहोस् !