वीरगंज (पर्सा), ३० असार । देशभर अवरुद्ध रहेको यातायात कार्यालयको सिस्टम सुचारु भएको छ । देशभरका यातायात व्यवस्था कार्यालयहरुमा केही दिनयता देखिएको प्राविधिक समस्या समाधान भएको हो ।
केन्द्रीय सर्भर र नेटवर्कमा आएको खराबीका कारण सवारी चालक अनुमतिपत्रको आवेदन, नवीकरण, स्मार्ट कार्ड प्रिन्ट, सवारी साधनको नामसारी, कर भुक्तानी तथा जाँचपासलगायतका सम्पूर्ण अनलाइन सेवाहरू पूर्ण रुपमा ठप्प भएका थिए । प्रणालीले काम गर्न छाडेपछि देशभरका यातायात कार्यालयहरूको दैनिक प्रशासनिक काम ठप्प प्रायः बनेको थियो ।
प्राविधिक टोलीले लगातारको प्रयासपछि सर्भरको समस्यालाई ट्र्याक गरी त्यसको समाधान गरेसँगै आज दिउँसो ३ बजेबाट यातायात कार्यालयहरूको सिस्टम पूर्ण रुपमा सञ्चालनमा आएको हो । यातायात व्यवस्था विभागका आइटी डाइरेक्टर केशव खतिवडाले अहिले सिस्टम चलेर देशभरका कार्यालयबाट सेवा सुरु भएको बताए ।
उनले भने,‘अहिले देशभरका धेरै कार्यालयबाट सेवा सुरु भएको छ । बाँकी केहीको पनि सेवा सुचारु गर्नेको लागि काम हुँदै छ ।
प्रतिक्रिया दिनुहोस् !