वीरगंज (पर्सा), ३० असार । वीरगंजस्थित जिल्ला विकास समिति नजिक रहेको नीलकण्ठ होस्पिटल एन्ड रिसर्च सेन्टर उपचारका क्रममा बिरामीबाट अत्यधिक शुल्क असुलेको आरोपमा विवादमा तानिएको छ । उपचार गराएका एक बिरामीका परिवारले पत्रकार सम्मेलन गर्दै सामान्य ज्वरोका बिरामीलाई अनावश्यक रूपमा आईसीयूमा राखी करिब एक लाख रुपैयाँ बराबरको उपचार खर्च उठाइएको दाबी गरेका छन् ।
पीडित पक्षका अनुसार पर्साको जगन्नाथपुर गाउँपालिकाका ममताज अन्सारीलाई चार दिनअघि सामान्य ज्वरो आएपछि उपचारका लागि उक्त अस्पताल लगिएको थियो । उनीहरूको भनाइमा बिरामीको स्वास्थ्य अवस्था गम्भीर नभएपनि अस्पतालले आईसीयूमा भर्ना गरी विभिन्न परीक्षण, औषधि तथा उपचार प्रक्रियाको नाममा ठूलो रकमको बिल तयार गरेको हो ।
बिरामीका आफन्तले आवश्यकता भन्दा बढी स्वास्थ्य परीक्षण र उपचार गरिएको आरोप लगाउँदै त्यसबाट आफूहरूलाई अनावश्यक आर्थिक भार बेहोर्न बाध्य बनाइएको बताएका छन् । उनीहरूले बिरामीको वास्तविक स्वास्थ्य अवस्थाभन्दा आर्थिक लाभलाई प्राथमिकता दिइएको आरोपसमेत लगाएका छन् ।
पत्रकार सम्मेलनमार्फत पीडित परिवारले सम्बन्धित सरकारी निकायसँग घटनाको निष्पक्ष छानबिन गर्न, अस्पतालको उपचार प्रक्रिया तथा बिलिङ प्रणालीको अनुसन्धान गरी सत्यतथ्य सार्वजनिक गर्न र आरोप पुष्टि भए कानुनबमोजिम कारबाही गर्न माग गरेका छन् ।
यता, यस विषयमा अस्पतालको धारणा बुझ्न नीलकण्ठ होस्पिटल एन्ड रिसर्च सेन्टरसँग सम्पर्क गर्ने प्रयास गरिएपनि अस्पताल प्रशासनबाट कुनै आधिकारिक प्रतिक्रिया प्राप्त हुन सकेन । यस घटनापछि स्थानीयवासी तथा सरोकारवालाहरूले निजी स्वास्थ्य संस्थाको सेवा, उपचारको पारदर्शिता, बिरामीको अधिकार र शुल्क निर्धारण प्रक्रियामाथि सम्बन्धित निकायले गम्भीर छानबिन गरी वास्तविकता सार्वजनिक गर्नुपर्ने आवश्यकता औंल्याएका छन् ।
प्रतिक्रिया दिनुहोस् !