गोलबजार (सिरहा), २५ असार । सिरहाको गोलबजार नगरपालिका–९ चोहर्वामा स्कुल बसको ठक्करबाट मोटरसाइकल चालकको घटनास्थलमै मृत्यु भएको छ भने मोटरसाइकलमा सवार अन्य दुई जना गम्भीर घाइते भएका छन् । दुर्घटना बुधबार पूर्व–पश्चिम राजमार्गअन्तर्गत चोहर्वा चोक नजिक भएको हो ।
प्रहरीका अनुसार पूर्वबाट पश्चिमतर्फ गइरहेको ‘मे १ ख २३६३ नम्बरको शिव शक्ति बाल बोर्डिङ स्कुलको बस’ले सोही दिशामा अघि बढिरहेको ‘म.प्र.०१–००५ प ३४०६ नम्बरको मोटरसाइकल’ लाई ठक्कर दिएको थियो । जिल्ला ट्राफिक प्रहरी कार्यालयका अनुसार राजमार्गमा गुडिरहेको बस चोहर्वा चोक नजिक पुगेपछि एक्कासि उत्तरतर्फ रहेको गोविन्दपुर सडकखण्डमा मोडिएको थियो । बसले अप्रत्याशित रूपमा दिशा परिवर्तन गरेपछि पछाडिबाट आइरहेको मोटरसाइकल नियन्त्रण गुमाएर बसको बीच भागमा ठोक्किन पुगेको प्रारम्भिक अनुसन्धानबाट खुलेको छ ।
दुर्घटनामा मोटरसाइकल चालकको घटनास्थलमै मृत्यु भएको प्रहरीले जनाएको छ । मृतकको उमेर करिब २५ वर्ष रहेको अनुमान गरिएपनि उनको साथबाट कुनै परिचय खुल्ने कागजात फेला नपरेकाले हालसम्म पहिचान हुन सकेको छैन । शवलाई पोस्टमार्टमका लागि प्रादेशिक अस्पताल लहान पठाइएको छ ।
दुर्घटनामा मोटरसाइकलको पछाडि सवार मिर्चैया नगरपालिका–५ निवासी २४ वर्षीय शङख रिहान र १९ वर्षीय यनतियाज राइन गम्भीर घाइते भएका छन् । उनीहरूको स्थानीय भूमिजा अस्पतालमा प्रारम्भिक उपचारपछि थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान रेफर गरिएको प्रहरीले जनाएको छ ।
घटनालगत्तै इलाका प्रहरी कार्यालय गोलबजारले दुर्घटनामा संलग्न स्कुल बस र चालकलाई नियन्त्रणमा लिएको छ । दुर्घटनाको कारण तीव्र गति, बसको अचानक मोडाइ वा अन्य प्राविधिक पक्षमध्ये कुन हो भन्ने विषयमा प्रहरीले विस्तृत अनुसन्धान अघि बढाएको जनाएको छ । प्रहरीले दुर्घटनाका सम्बन्धमा प्रत्यक्षदर्शीको बयान संकलन गर्नुका साथै घटनास्थलको प्राविधिक परीक्षणसमेत गरिरहेको जनाएको छ ।
प्रारम्भिक रूपमा बस चालकको लापरबाही दुर्घटनाको प्रमुख कारण हुन सक्ने आशंका गरिएपनि अनुसन्धानपछि मात्रै वास्तविक कारण खुल्ने प्रहरीको भनाइ छ ।
प्रतिक्रिया दिनुहोस् !