वीरगंज (पर्सा), २४ असार । पर्साको कालिकामाई गाउँपालिकामा कार्यरत एक कर्मचारीमाथि गाउँ कार्यपालिकाको कार्यालयभित्रै कुटपिट भएको घटनाको विरोधमा गाउँपालिकाका सम्पूर्ण कर्मचारी आन्दोलनमा उत्रिएका छन् । दोषीमाथि कडा कानुनी कारबाहीको माग गर्दै उनीहरूले पेनडाउन आन्दोलन सुरु गरेका छन्, जसका कारण गाउँपालिकाको सम्पूर्ण प्रशासनिक सेवा प्रभावित भएको छ ।
मंगलबार दिउँसो करिब १२ः५१ बजे गाउँपालिकामा कार्यरत कम्प्युटर अपरेटर (चौथो तह) चन्दन कुमार चौरसियामाथि कार्यालय परिसरभित्रै कुटपिट तथा दुर्व्यवहार भएको आरोप लगाइएको छ । घटनापछि आक्रोशित कर्मचारीहरूले प्रमुख जिल्ला अधिकारी भोला दाहाललाई ज्ञापनपत्र बुझाउँदै दोषीमाथि तत्काल कानुनी प्रक्रिया अघि बढाउन माग गरेका छन् ।
कर्मचारीहरूले कार्यालय समयमै आफ्नो जिम्मेवारी निर्वाह गरिरहेका कर्मचारीमाथि भएको आक्रमणलाई व्यक्तिगत घटनाका रूपमा नभई सम्पूर्ण कर्मचारी समुदायमाथिको आक्रमणका रूपमा व्याख्या गरेका छन् । यस्तो घटनाले कर्मचारीहरूको मनोबल कमजोर बनाउनुका साथै सार्वजनिक सेवा प्रवाह, प्रशासनिक कार्यसम्पादन र सुशासनमा प्रतिकूल प्रभाव पर्ने उनीहरूको भनाइ छ ।
संयुक्त रूपमा जारी गरिएको प्रेस विज्ञप्तिमा घटनाको पृष्ठभूमि स्वास्थ्य शाखामार्फत सञ्चालन भइरहेको बहुक्षेत्रीय पोषण कार्यक्रमसँग सम्बन्धित विषयसँग जोडिएको उल्लेख गरिएको छ । उक्त विषयमा चौरसियाको कुनै व्यक्तिगत संलग्नता वा जिम्मेवारी नरहेको अवस्थामा उनीमाथि आक्रमण हुनु अत्यन्त निन्दनीय र दुर्भाग्यपूर्ण भएको कर्मचारीहरूको निष्कर्ष छ ।
विज्ञप्तिमार्फत कर्मचारीहरूले आफूलाई जेनजी अगुवा बताउने कालिकामाई गाउँपालिका–२ का राजनिश कुशवाहा, वडा नं. ३ का वडाध्यक्ष सञ्जय कुमार पटेलसहित घटनामा संलग्न अन्य व्यक्तिहरूमाथि संघीय कानुनअनुसार कडा कारबाही गर्न माग गरेका छन् । साथै सरकारी कार्यालयमा कार्यरत कर्मचारीको सुरक्षा सुनिश्चित गर्न सम्बन्धित निकायसँग उनीहरूले जोडदार आग्रह गरेका छन् ।
माग पूरा नभएसम्म कार्यालयको नियमित कामकाजमा सहभागी नहुने, जिल्ला प्रशासन कार्यालयमा धर्ना जारी राख्ने तथा पेनडाउन आन्दोलनलाई निरन्तरता दिने चेतावनी पनि कर्मचारीहरूले दिएका छन् । कर्मचारीहरूको आन्दोलनका कारण बुधबार गाउँपालिकाको सम्पूर्ण प्रशासनिक सेवा ठप्प भएको छ । गाउँपालिका अन्तर्गत सञ्चालित सबै विद्यालयसमेत बन्द रहेका छन् ।
उता, इलाका प्रहरी कार्यालय पोखरियाले घटनामा संलग्न रहेको आरोपमा कालिकामाई गाउँपालिका–२ का रामबालक साह कानु र अरविन्द चौरसियालाई नियन्त्रणमा लिएको जनाएको छ । घटनामा संलग्न अन्य व्यक्तिको खोजी तथा घटनाबारे थप अनुसन्धान तीव्र रूपमा अघि बढाइएको प्रहरीले जनाएको छ ।
प्रतिक्रिया दिनुहोस् !