वीरगंज (पर्सा), २३ असार । ठोरी नाकाबाट भारतीय नम्बर प्लेटका चारपांग्रे सवारीसाधनको प्रवेश मंगलबारदेखि पुनः सञ्चालनमा आएको छ । प्रवेशमा लगाइएको रोक हटाइएपछि स्थानीय पर्यटन व्यवसायी, व्यापारी तथा सर्वसाधारणमा उत्साह छाएको छ ।
गत असार १९ गतेदेखि ठोरी बजारमा भारतीय नम्बर प्लेटका चारपांग्रे सवारीसाधनको आवागमन रोकिएपछि स्थानीय व्यवसायी तथा पर्यटनसँग आबद्ध सरोकारवालाले निरन्तर विरोध जनाउँदै आएका थिए । सोही विषयलाई लिएर प्रतिनिधिसभामा पर्सा निर्वाचन क्षेत्र नं. ४ का सांसद टेकबहादुर शाक्यले सरकारको ध्यानाकर्षण गराउँदै ठोरी र भिस्वा–जानकीटोलाबाट भारतीय सवारी प्रवेशमा लगाइएको प्रतिबन्ध तत्काल हटाउन माग गरेका थिए ।
यसैबीच, ठोरीका पर्यटन व्यवसायीहरूको प्रतिनिधिमण्डलले जिल्ला प्रशासन कार्यालयमा पुगेर ज्ञापनपत्र बुझाउँदै समस्या समाधानका लागि पहल गर्न आग्रह गरेको थियो । यी पहल र छलफलपछि भारतीय नम्बर प्लेटका चारपांग्रे सवारीसाधनको प्रवेशलाई सहजीकरण गर्ने विषयमा सम्बन्धित निकायबीच सकारात्मक सहमति बनेको हो ।
भन्सार कार्यालयका अनुसार अब भारतीय नम्बर प्लेटका चारपांग्रे सवारीसाधनले ठोरी छोटी भन्सारबाट ‘निःशुल्क सुविधा पास’ लिएपछि ठोरी बजार तथा आसपासका पर्यटकीय गन्तव्यहरूको भ्रमण गर्न पाउने व्यवस्था गरिएको छ । नयाँ व्यवस्थाअनुसार मंगलबार ‘बीआर २२ पीए ०३९२’ नम्बरको भारतीय चारपांग्रे सवारीले ठोरी छोटी भन्सारबाट निःशुल्क सुविधा पास प्राप्त गरी सबैभन्दा पहिलो पटक ठोरी बजारमा प्रवेश गरेको छ । यससँगै भारतीय सवारीसाधनको प्रवेश व्यवस्था औपचारिक रूपमा पुनः लागू भएको छ ।
स्थानीय सरोकारवालाले भारतीय पर्यटकको आगमन पुनः सुरु भएसँगै ठोरीको पर्यटन क्षेत्रले नयाँ गति लिने, सीमावर्ती व्यापार–व्यवसाय चलायमान हुने तथा स्थानीय आर्थिक गतिविधिमा सकारात्मक प्रभाव पर्ने विश्वास व्यक्त गरेका छन् ।
प्रतिक्रिया दिनुहोस् !