कलैया (बारा), २३ असार । बाराको सुवर्ण गाउँपालिकामा रूखको हाँगा काट्ने क्रममा दुर्घटना हुँदा एक जनाको घटनास्थलमै मृत्यु भएको छ । जिल्ला प्रहरी कार्यालय बाराका प्रवक्ता प्रहरी नायब उपरीक्षक (डीएसपी) मीनबहादुर घलेका अनुसार मृत्यु हुनेमा सुवर्ण गाउँपालिका–१ रामटोल निवासी ५५ वर्षीय जोखन महरा रहेका छन् ।
प्रहरीका अनुसार सुवर्ण गाउँपालिका–३ सन्तगज निवासी शिवधारी पण्डितको जग्गामा रहेको पाकडको रूख वडा नं. ७ निवासी बाबुलाल यादवले खरिद गरेका थिए । सोही रूख काट्ने जिम्मा महरालाई दिइएको थियो । रूखको हाँगा काट्ने क्रममा अचानक अर्को ठूलो हाँगा खसेर महरालाई च्यापेपछि उनको घटनास्थलमै मृत्यु भएको प्रहरीले जनाएको छ ।
मृतक महराको शव आवश्यक कानुनी प्रक्रिया तथा पहिचानका लागि प्रादेशिक अस्पताल कलैयामा राखिएको छ । घटनाबारे थप अनुसन्धान भइरहेको जिल्ला प्रहरी कार्यालय बाराले जनाएको छ । 
प्रतिक्रिया दिनुहोस् !