जनकपुरधाम (धनुषा), २३ असार । धनुषाको धनुषाधाम नगरपालिका–९ धारापानीस्थित पूर्वपश्चिम लोकमार्गमा यात्रुवाहक बस दुर्घटना हुँदा चालकसहित तीन जना घाइते भएका छन् । प्रहरीका अनुसार सोमबार राति करिब १ बजे काँकडभिट्टाबाट वीरगञ्जतर्फ जाँदै गरेको प्रदेश १–०१–००१ ख ३८४३ नम्बरको बस अनियन्त्रित भई सडकछेउ पल्टिँदा दुर्घटना भएको हो ।
इलाका प्रहरी कार्यालय ढल्केबरका अनुसार बसमा सवार १४ यात्रुमध्ये तीन जना घाइते भएका छन् । घाइते हुनेमा बस चालक झापाको मेचीनगर नगरपालिका–७ निवासी ३५ वर्षीय सन्तुलाल चौधरी रहेका छन् । उनको शरीरका विभिन्न भागमा चोट लागेको छ भने अवस्था मध्यम रहेको प्रहरीले जनाएको छ । उनको जनकपुरधामस्थित साई ट्रमा सेन्टरमा उपचार भइरहेको छ ।
दुर्घटनामा भारतका ४० वर्षीय सन्दीप पाठक र उनकी श्रीमती ३५ वर्षीया सुनिता क्षेत्री पनि घाइते भएका छन् । दुवैको धनुषाको वीरेन्द्रबजारस्थित कमलामाई अस्पतालमा उपचार भइरहेको प्रहरीले जनाएको छ ।
दुर्घटनापछि सकुशल रहेका ११ जना यात्रुलाई अर्को बसमार्फत गन्तव्यतर्फ पठाइएको इलाका प्रहरी कार्यालय ढल्केबरले जनाएको छ ।
बस अनियन्त्रित हुनुको कारणबारे प्रहरीले अनुसन्धान सुरु गरेको छ । पछिल्ला दिनहरूमा पूर्वपश्चिम लोकमार्गमा तीव्र गति, लापरबाही तथा सडक अवस्थाका कारण सवारी दुर्घटनाका घटना बढ्दै गएको देखिएको छ । 
प्रतिक्रिया दिनुहोस् !