६ महिनादेखि रोकिएको विपद् राहत वितरण पुनः सुरु, १५ परिवारले राहत पाउने

वीरगंज (पर्सा), १८ असार । वीरगंज महानगरपालिकामा करिब छ महिनादेखि अवरुद्ध रहेको विपद् राहत वितरण प्रक्रिया पुनः सञ्चालनमा आएको छ । आगलागी, बाढी र हावाहुरीबाट प्रभावित १५ परिवारलाई राहत उपलब्ध गराउने निर्णयसँगै लामो समयदेखि सहायता पर्खिरहेका पीडितले राहत पाउने भएका छन् ।

महानगरपालिकाका अनुसार कार्यवाहक प्रमुख इम्तियाज आलमको पहलमा विपद् व्यवस्थापन शाखामा दर्ता भएका निवेदनहरूको आवश्यक अध्ययन तथा छानबिन गरी राहत वितरण प्रक्रिया पुनः अघि बढाइएको हो । उनको निर्देशनपछि वडा नं. १४, १७, १९ र २६ लगायतका क्षेत्रमा प्राकृतिक विपद्का कारण भौतिक क्षति बेहोरेका वास्तविक पीडितहरूको पहिचान गरिएको थियो । सोही आधारमा प्राप्त निवेदन र क्षतिको प्रकृतिको मूल्याङ्कन गर्दै प्रतिपरिवार ५ हजारदेखि २५ हजार रुपैयाँसम्म राहत उपलब्ध गराउने निर्णय गरिएको महानगरपालिकाले जनाएको छ ।

विपद् व्यवस्थापन शाखा प्रमुख विभा मिश्राका अनुसार कार्यवाहक प्रमुख आलमको समन्वय र सक्रियतापछि आवश्यक प्रशासनिक प्रक्रिया तीव्र रूपमा अघि बढाइएको छ । उनका अनुसार सम्बन्धित पीडित परिवारलाई केही दिनभित्रै राहत रकम वितरण गरिनेछ । कार्यवाहक प्रमुख आलमले प्राकृतिक विपद्का कारण समस्यामा परेका नागरिकलाई महानगरपालिकाले आगामी दिनमा पनि आवश्यक राहत, सहयोग र संरक्षण उपलब्ध गराउन प्रतिबद्ध रहेको बताएका छन् ।