वीरगंज (पर्सा), १८ असार । वैदेशिक रोजगारीका क्रममा अस्ट्रेलियामा निधन भएका पर्साका एक युवकको पार्थिव शरीर तीन महिना बितिसक्दा पनि नेपाल ल्याउन नसकिएको विषय प्रतिनिधिसभामा उठाइएको छ । पर्सा क्षेत्र नं. २ का प्रतिनिधिसभा सदस्य सुशील कुमार कानुले प्रतिनिधिसभाको बैठकमा सरकारको ध्यानाकर्षण गराउँदै आवश्यक कूटनीतिक पहल तत्काल थाल्न आग्रह गरेका हुन् ।
सांसद कानुले पर्सागढी नगरपालिका–७, बागेश्वरी निवासी २९ वर्षीय राकेश पटेलको करिब तीन महिनाअघि अस्ट्रेलियाको तामसेलियामा मृत्यु भएको जानकारी गराए । उनका अनुसार घटनासम्बन्धी विवरण वैशाख २३ गते नै परराष्ट्र मन्त्रालयमा दर्ता गरिएपनि हालसम्म पार्थिव शरीर स्वदेश ल्याउने प्रक्रिया टुंगोमा पुग्न सकेको छैन ।
उनले मृतकको पार्थिव शरीरलाई सुरक्षित, सम्मानजनक र यथाशीघ्र नेपाल ल्याउने व्यवस्था मिलाउन नेपाल सरकारले आवश्यक कूटनीतिक पहल गर्नुपर्ने आवश्यकता औंल्याए । साथै, विदेशमा रहेका नेपाली नागरिकको जीवन सुरक्षा, अधिकार संरक्षण तथा आकस्मिक परिस्थितिमा उद्धार र व्यवस्थापनका विषयमा सरकार अझ जिम्मेवार र संवेदनशील बन्नुपर्ने धारणा व्यक्त गरे ।
सांसद कानुले दिवंगत राकेश पटेलप्रति श्रद्धाञ्जली अर्पण गर्दै शोकाकुल परिवारप्रति गहिरो समवेदना व्यक्त गरेका छन् ।
प्रतिक्रिया दिनुहोस् !