धनुषामा होटल र किराना पसलमा अनुगमन, मापदण्ड उल्लङ्घन गर्ने होटललाई २५ हजार जरिवाना

जनकपुरधाम (धनुषा), १७ असार । होटल तथा रेस्टुरेन्टमा अस्वच्छ तथा गुणस्तरहीन खाना बिक्री भइरहेको भन्दै सर्वसाधारणबाट गुनासो बढेपछि धनुषाको पूर्व–पश्चिम राजमार्ग क्षेत्रका होटल तथा किराना पसलमा संयुक्त अनुगमन गरिएको छ । मधेश प्रदेश सरकारको गृह, कानुन तथा सञ्चार मन्त्रालयको नेतृत्वमा खाद्य प्रविधि तथा गुण नियन्त्रण कार्यालय, जनकपुर तथा जिल्ला प्रशासन कार्यालय धनुषाको संयुक्त टोलीले लालगढ र ढल्केबर क्षेत्रमा सञ्चालित होटल तथा किराना पसलमा अनुगमन गरेको हो ।

अनुगमनका क्रममा अधिकांश होटलले खाद्य स्वच्छतासम्बन्धी मापदण्ड पालना नगरेको, म्याद गुज्रिएका खाद्य सामग्री भण्डारण गरेको तथा अखाद्य र पुनःप्रयोग गरिएको तेल प्रयोग गरेर खाना पकाएको पाइएको टोलीले जनाएको छ । लालगढस्थित बौवा होटलमा मापदण्डविपरीत प्रयोग गरिएको तेलमा पकाइएको करिब १५ किलो माछा र मासु नष्ट गरिएको छ । खाद्य ऐन उल्लङ्घन गरेको ठहर गर्दै उक्त होटललाई २५ हजार रुपैयाँ जरिवाना गरिएको अनुगमन टोलीले जनाएको छ ।

यसैगरी, लालगढ र ढल्केबर क्षेत्रमा सञ्चालित गौतम, पुकार, थापा, कोमललगायत नौ वटा होटल तथा केही किराना पसलमा पनि अनुगमन गरिएको थियो । अनुगमनका क्रममा भेटिएका म्याद गुज्रिएका खाद्य सामग्री तत्काल नष्ट गरिएको छ । अनुगमन टोलीले होटल व्यवसायीलाई स्वच्छ, सफा र ताजा खाद्य सामग्री मात्र प्रयोग गर्न, मूल्यसूचीअनुसार सेवा उपलब्ध गराउन, उपभोक्तासँग तोकिएकोभन्दा बढी मूल्य नलिन तथा प्रचलित खाद्य मापदण्डको पूर्ण पालना गरेर व्यवसाय सञ्चालन गर्न निर्देशन दिएको छ ।

खाद्य प्रविधि तथा गुण नियन्त्रण कार्यालयले उपभोक्ताको स्वास्थ्य सुरक्षालाई प्राथमिकतामा राख्दै यस्ता बजार अनुगमनलाई आगामी दिनमा पनि निरन्तरता दिइने जनाएको छ ।