राजविराज (सप्तरी), १७ असार । झुम्का कारागारबाट फरार एक कैदीबन्दी शंकास्पद कारसहित सप्तरीबाट पक्राउ परेका छन् । पक्राउ पर्नेमा मकवानपुरको हेटौंडा उपमहानगरपालिका–१४ नयाँबस्ती निवासी २४ वर्षीय विक्रम भनिने चन्द्रबहादुर पाख्रिन रहेका छन् । सप्तरी प्रहरीले पूर्व–पश्चिम राजमार्गअन्तर्गत हनुमाननगर कंकालिनी नगरपालिका–१ स्थित एक होटल अगाडि पार्किङ गरिएको बा.८च ९४३० नम्बर उल्लेखित कारसहित उनलाई नियन्त्रणमा लिएको हो ।
गाडीको विवरण जाँच गर्दा नम्बर प्लेटसँग इन्जिन र चेसिस नम्बर नमिलेको पाइएको छ । प्रारम्भिक अनुसन्धानमा उक्त सवारी चोरीको हुन सक्ने आशंका रहेको प्रहरीले जनाएको छ । प्रहरीले पाख्रिनविरुद्ध चोरीसम्बन्धी कसुरमा अनुसन्धान अघि बढाएको छ, साथै पहिले कै बाँकी कैद सजाय भुक्तानका लागि उनलाई पुनः झुम्का कारागार पठाइने तयारी गरिएको छ ।
पाख्रिन लागूऔषध मुद्दामा कैद सजाय भुक्तान गरिरहेका बेला गत भदौ २४ गते जेन्जी विद्रोहको क्रममा झुम्का कारागारबाट फरार भएका थिए । सप्तरी प्रहरीका अनुसार उनको अझै १७ महिना कैद सजाय भुक्तान गर्न बाँकी रहेको छ ।
प्रतिक्रिया दिनुहोस् !