बर्दिवास (महोत्तरी), ५ असार । बालविवाह नियन्त्रण र कानुनी उमेरमा विवाह गर्ने संस्कृतिलाई प्रोत्साहन गर्न महोत्तरीको बर्दिबास नगरपालिकाले नयाँ योजना अघि सारेको छ । आगामी आर्थिक वर्ष २०८३/८४ देखि २० वर्ष उमेर पूरा भएपछि विवाह गर्ने नगरभित्रका प्रत्येक युवतीलाई ५१ हजार रुपैयाँ नगद प्रोत्साहन उपलब्ध गराइने भएको छ । नगरपालिकाको १८औँ नगरसभामा प्रस्तुत नीति तथा कार्यक्रम तथा बजेटमार्फत उक्त व्यवस्था सार्वजनिक गरिएको हो ।
नगरप्रमुख प्रल्हादकुमार क्षेत्रीका अनुसार बालविवाह न्यूनीकरण गर्दै कानुनअनुसार विवाह गर्ने बानीको विकास गराउने उद्देश्यले यो कार्यक्रम ल्याइएको हो । उनले यस व्यवस्थाले किशोरी तथा अभिभावकमा सचेतना वृद्धि हुनुका साथै बालविवाह अन्त्य अभियानलाई थप प्रभावकारी बनाउने विश्वास व्यक्त गरे । नगरसभामा घोषणा गरिएको यो कार्यक्रमप्रति विभिन्न क्षेत्रबाट सकारात्मक प्रतिक्रिया प्राप्त भएको नगरप्रमुख क्षेत्रीले बताए ।
यसअघि पनि बर्दिबास नगरपालिकाले मुसहर समुदायलाई लक्षित गर्दै २०८० चैत ५ गते उमेर पुगेपछि विवाह गर्ने जोडीलाई ५० हजार रुपैयाँ प्रोत्साहन दिने योजना लागू गरेको थियो । तर नगरपालिकाको अभिलेखअनुसार हालसम्म बर्दिबास–१२ का एक जोडीले मात्र उक्त सुविधा प्राप्त गरेका छन् । स्थानीय सामाजिक तथा राजनीतिक कार्यकर्ता देवनारायण महतोका अनुसार मुसहर समुदायका लागि ल्याइएको योजनाबाट अत्यन्तै कम लाभग्राही देखिनुले उक्त समुदायमा बालविवाह अझै चुनौतीकै रूपमा रहेको संकेत गर्छ ।
करिब एक लाख जनसंख्या रहेको बर्दिबास नगरपालिकाका १४ वडामध्ये १३ वडा पछिल्ला दुई वर्षभित्र बालविवाहमुक्त घोषणा भइसकेका छन् । अब वडा नम्बर १२ मात्र बालविवाहमुक्त घोषणा हुन बाँकी रहेको छ । नगरपालिकाले अब लागू गर्न लागेको नयाँ व्यवस्थाले नगरका सबै समुदायका छोरीहरूलाई समेट्नेछ । यद्यपि मुसहर समुदायका हकमा भने यसअघि लागू गरिएको विशेष प्रोत्साहन कार्यक्रम यथावत् रहने नगरप्रमुख क्षेत्रीले स्पष्ट पारेका छन् । उनका अनुसार उक्त समुदायमा बालविवाहको समस्या तुलनात्मक रूपमा बढी देखिएकाले पुरुष र महिला दुवैलाई प्रोत्साहन रकम उपलब्ध गराउने व्यवस्था निरन्तर कायम रहनेछ ।
नगरपालिकाको विश्वास छ, आर्थिक प्रोत्साहनसँगै बढ्ने सामाजिक चेतनाले बालविवाह नियन्त्रणमा थप सहयोग पुग्नेछ र कानुनी उमेरपछि विवाह गर्ने अभ्यासलाई संस्थागत बनाउन मद्दत गर्नेछ । 
प्रतिक्रिया दिनुहोस् !