वीरगंज (पर्सा), ५ असार । यातायात व्यवस्था कार्यालय, सवारी चालक अनुमतिपत्र पर्साका तत्कालीन अधिकृत कमलराज गौतम गैरकानूनी सम्पत्ति आर्जन गरी भ्रष्टाचार गरेको अभियोगमा दोषी ठहर भएका छन् । विशेष अदालतले शुक्रबार फैसला सुनाउँदै उनलाई एक वर्ष कैद, एक करोड आठ लाख रुपैयाँभन्दा बढी जरिवाना तथा सोही बराबरको सम्पत्ति जफत गर्ने आदेश दिएको छ ।
विशेष अदालतका अध्यक्ष सुदर्शनदेव भट्ट तथा सदस्यहरू डिल्लीरत्न श्रेष्ठ र विदुर कोइरालाको इजलासले गौतमविरुद्धको भ्रष्टाचार मुद्दामा कसुर कायम गर्दै सजाय निर्धारण गरेको हो । अदालतले उनलाई पीडित राहत कोषमा ४ लाख ३२ हजार रुपैयाँभन्दा बढी क्षतिपूर्ति शुल्कसमेत बुझाउनुपर्ने फैसला गरेको छ । अख्तियार दुरुपयोग अनुसन्धान आयोगले २०८२ असार ३ गते गौतम र उनकी पत्नी सरला नेपाललाई प्रतिवादी बनाएर मुद्दा दायर गरेको थियो । पत्नीको नाममा रहेको सम्पत्ति जफत प्रयोजनका लागि उनलाई पनि प्रतिवादी बनाइएको थियो ।
अख्तियारले पेश गरेको विवरणअनुसार गौतमको वैध आय करिब २ करोड ९० लाख रुपैयाँ रहेको देखिएपनि उनको खर्च तथा सम्पत्ति ५ करोड ४० लाख रुपैयाँभन्दा बढी भेटिएको थियो । आयोगले साढे दुई करोड रुपैयाँभन्दा बढी रकमको स्रोत नखुलेको दाबी गरेपनि अदालतले अन्तिम रूपमा एक करोड रुपैयाँ बराबरको सम्पत्ति अवैध रूपमा आर्जन भएको निष्कर्ष निकालेको छ ।
२०५५ साल वैशाखदेखि सार्वजनिक पदमा रहेका गौतमको २०७९ चैतसम्मको आय–व्यय विश्लेषण गर्दा पारिश्रमिक, भत्ता, सञ्चय कोष, बैंक मौज्दात, घरजग्गा बिक्री, कृषि तथा घरभाडाबाट प्राप्त आम्दानीलाई वैध स्रोतका रूपमा स्वीकार गरिएको थियो । तर त्यसबाहेकको सम्पत्तिको स्रोत पुष्टि गर्न नसकेपछि अदालतले भ्रष्टाचारबाट आर्जित सम्पत्ति ठहर गरेको हो ।
छलफलका क्रममा गौतमले रुपन्देहीमा घरजग्गा खरिद गर्दा पुरानो घरको कवाडी बिक्रीबाट प्राप्त रकमलाई पनि आयमा समावेश गर्नुपर्ने जिकिर गरेका थिए । तर जग्गा खरिदकै स्रोत पुष्टि हुन नसकेको अवस्थामा कवाडी बिक्रीको रकमलाई वैध आय मान्न नसकिने अदालतको ठहर छ ।
त्यसैगरी चाडपर्व, टीकाटालो तथा सामाजिक परम्पराबाट प्राप्त रकमलाई पनि आयमा गणना गर्नुपर्ने माग गरिएको थियो । अदालतले भने पत्नी र छोराछोरीलाई प्राप्त दानदक्षिणा तथा उपहारस्वरूप प्राप्त रकमलाई स्वाभाविक मान्दै कुल पाँच लाख रुपैयाँ मात्र आयतर्फ समावेश गरेको छ ।
अध्ययन खर्चमा दोहोरो गणना भएको निष्कर्ष निकाल्दै केही व्यय रकम घटाएपनि समग्र विश्लेषणपछि एक करोड रुपैयाँको स्रोत खुल्न नसकेको अदालतले जनाएको छ । गौतमको जिम्मेवारीपूर्ण पद, भूमिका र गैरकानूनी रूपमा आर्जित सम्पत्तिको परिमाणलाई आधार मान्दै विशेष अदालतले उक्त सजाय निर्धारण गरेको हो । यसअघि उनले वार्षिक सम्पत्ति विवरणमा सम्पत्ति लुकाएको तथा झुठा विवरण पेश गरेको तथ्यसमेत अनुसन्धानका क्रममा खुलेको थियो । 
प्रतिक्रिया दिनुहोस् !