वीरगंज (पर्सा), ३ असार । सडक डिभिजन कार्यालय हेटौँडाले त्रिभुवन राजपथको सडक सीमाभित्र अझै बाँकी रहेका अवैध संरचनाहरू पाँच दिनभित्र स्वेच्छाले हटाउन सम्बन्धित पक्षलाई अन्तिम चेतावनी दिएको छ । तोकिएको अवधिभित्र संरचना नहटाइए कानुनी प्रक्रिया अनुसार कार्यालय आफैँले हटाउने तयारी गरेको जनाएको छ । डिभिजन प्रमुख किरण कार्कीका अनुसार सडक ऐन, २०३१ को व्यवस्था बमोजिम सडक अतिक्रमण गरेर बनाइएका संरचनाहरू हटाउने कार्यलाई अब थप कडाइका साथ अघि बढाइनेछ ।
समयसीमा समाप्त भएपछि सडक सीमा खाली गराउन डोजर प्रयोग गरी संरचना भत्काइने उनले स्पष्ट पारे । यस सम्बन्धमा सडक डिभिजन कार्यालयले सार्वजनिक सूचना जारी गर्दै त्रिभुवन राजपथअन्तर्गत वीरगंजको सिरसिया मितेरी पुलदेखि बहुअरी गण्डक चोकसम्मको सडक खण्डमा सडकको केन्द्र रेखाबाट दायाँ–बायाँ २५–२५ मिटर क्षेत्र संरक्षण गर्ने अभियान गत वैशाख ६ गतेदेखि नै सञ्चालन भइरहेको जानकारी गराएको छ ।
सडक विस्तार तथा सीमा संरक्षण अभियानका क्रममा धेरै संरचनाहरू आंशिक रूपमा हटाइएका छन् । तर केही भवनहरू अझै पूर्ण रूपमा नहटाइएको र क्षतिग्रस्त अवस्थामै प्रयोग भइरहेको पाइएको कार्यालयको भनाइ छ । कतिपय घरधनी तथा व्यवसायीहरूले जोखिमयुक्त भवनमै बसोबास तथा व्यापार सञ्चालन गरिरहेको अवस्था देखिएपछि कार्यालयले थप सतर्कता अपनाएको हो ।
डिभिजन प्रमुख कार्कीले आंशिक रूपमा भत्किएका वा क्षति पुगेका भवनहरूमा बसोबास तथा व्यवसाय सञ्चालन नगर्न आग्रह गरेका छन् । त्यस्ता संरचनाहरू कुनै पनि बेला दुर्घटनाको कारण बन्न सक्ने भएकाले तत्काल सुरक्षित स्थानमा सर्न सम्बन्धित पक्षलाई अनुरोध गरिएको छ । साथै कार्यालयले सार्वजनिक सूचनाको बेवास्ता गर्दै जोखिमयुक्त भवनमा बसोबास वा व्यापारिक गतिविधि सञ्चालन गरेमा त्यसबाट उत्पन्न हुन सक्ने सम्भावित दुर्घटनाको जिम्मेवारी सम्बन्धित व्यक्ति स्वयंले वहन गर्नुपर्ने चेतावनी दिएको छ ।
सडक सीमा संरक्षण तथा अतिक्रमण हटाउने अभियानलाई प्रभावकारी बनाउन प्रशासनले अन्तिम चरणको कदम चालेसँगै अब पाँच दिनभित्र सम्बन्धित पक्षले संरचना हटाउने वा सरकारी कारबाही सामना गर्ने अवस्था सिर्जना भएको छ । 
प्रतिक्रिया दिनुहोस् !