वीरगंज (पर्सा), १ असार । विभिन्न बैंकिङ कसुर तथा चेक अनादरसम्बन्धी मुद्दामा अदालतबाट कैद र जरिवानाको सजाय सुनाइएपछि फरार रहेका एक प्रतिवादीलाई पर्सा प्रहरीले पक्राउ गरेको छ । जिल्ला प्रहरी कार्यालय पर्साको फैसला कार्यान्वयन विशेष टोलीले सोमबार बिहान अदालतका फैसला कार्यान्वयन गर्ने क्रममा पर्साको पकाहाँ मैनपुर गाउँपालिका–२ निवासी ३४ वर्षीय राजेश सहनीलाई नियन्त्रणमा लिएको हो । उनलाई वीरगंज महानगरपालिका–११ क्षेत्रबाट पक्राउ गरिएको प्रहरीले जनाएको छ ।
प्रहरीका अनुसार सहनीविरुद्ध बैंकिङ कसुर तथा चेक अनादरका चार वटा छुट्टाछुट्टै मुद्दामा पर्सा जिल्ला अदालतबाट सजायको फैसला भइसकेको थियो । तीमध्ये एक बैंकिङ कसुर मुद्दामा उनलाई २ दिन कैद र ३ लाख ६० हजार रुपैयाँ जरिवाना तोकिएको छ भने अर्को मुद्दामा १ वर्ष ५ महिना ५ दिन कैदसहित ५५ हजार रुपैयाँ जरिवाना हुने फैसला भएको थियो । त्यसैगरी चेक अनादरसम्बन्धी दुई वटा मुद्दामा जनही ५ हजार रुपैयाँका दरले जरिवाना निर्धारण गरिएको प्रहरीको भनाइ छ ।
पक्राउ परेका सहनीलाई आवश्यक कानुनी प्रक्रिया तथा फैसला कार्यान्वयनका लागि पर्सा जिल्ला अदालतमा उपस्थित गराइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरिबहादुर बस्नेतले जानकारी दिए । प्रहरीले अदालतबाट कैद तथा जरिवाना सजाय सुनाइएर फरार रहेका व्यक्तिहरूको खोजी तथा पक्राउ अभियानलाई निरन्तर रूपमा अघि बढाइरहेको जनाएको छ । 
प्रतिक्रिया दिनुहोस् !