वीरगंज (पर्सा), २९ जेठ । पर्सा प्रहरीले भन्सार छली गरेर भित्र्याइएका ठूलो परिमाणका स्याउ र ट्र्याक्टरका पार्टपुर्जा बरामद गर्दै चारजनालाई नियन्त्रणमा लिएको छ । बरामद सामग्री तथा पक्राउ परेकाहरूलाई थप अनुसन्धान र कारबाहीका लागि वीरगंज भन्सार कार्यालय पठाइएको प्रहरीले जनाएको छ ।
जिल्ला प्रहरी कार्यालय पर्साका अनुसार विशेष सूचनाको आधारमा खटिएको टोलीले वीरगंज महानगरपालिका–१६ स्थित मितेरी पुलमुनिको सडकखण्डमा भारततर्फ जाँदै गरेको बी.म.न.पा. १ ह १–०७९६ नम्बरको अटो रिक्सालाई रोकेर जाँच गरेको थियो । जाँचका क्रममा अटोमा भन्सार प्रक्रिया पूरा नगरिएका ८ कार्टुन स्याउ फेला परेका थिए ।
अटो रिक्सामा सवार व्यक्तिहरूसँग गरिएको सोधपुछपछि उक्त स्याउ वीरगंज महानगरपालिका–८ गहवास्थित एक गोदामबाट ल्याइएको खुल्न आएको प्रहरीको भनाइ छ । त्यसपछि कानुनी प्रक्रिया पूरा गरी गोदाममा गरिएको खानतलासीबाट थप ५९ कार्टुन स्याउ बरामद गरिएको थियो । प्रहरीले कुल ६७ कार्टुन स्याउसहित गोदाम सञ्चालक वीरगंज महानगरपालिका–१४ निवासी २९ वर्षीय धनन्जय प्रसाद कलवार, उनका सहयोगी २० वर्षीय अमन कुमार पासवान तथा अटो चालक वीरगंज–२ छप्कैयाका १९ वर्षीय इब्राम आलमलाई नियन्त्रणमा लिएको जनाएको छ ।
यसैगरी अर्को अपरेशनमा प्रहरीले वीरगंज महानगरपालिका–१९ बिन्दबासिनीस्थित राहुल मेशिनरी हार्डवेयरमा छापा मारेर भन्सार छलीका ट्र्याक्टर पार्टपुर्जा बरामद गरेको छ । विशेष सूचनाका आधारमा गरिएको खानतलासीका क्रममा करिब २ लाख ७ हजार रुपैयाँ मूल्य बराबरका विभिन्न पार्टपुर्जा फेला परेको प्रहरीले जनाएको छ । उक्त प्रकरणमा पसल सञ्चालक बहुदरमाई नगरपालिका–९ निवासी करिब ४० वर्षीय जगत नारायण प्रसाद गुप्तालाई नियन्त्रणमा लिइएको छ । बरामद सामानसहित उनलाई पनि थप अनुसन्धान तथा आवश्यक कारबाहीका लागि वीरगंज भन्सार कार्यालय बुझाइएको छ ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतका अनुसार भन्सार छली तथा अवैध कारोबार नियन्त्रणका लागि प्रहरीको निगरानी र कारबाही अभियान निरन्तर जारी रहनेछ । 
प्रतिक्रिया दिनुहोस् !