कलैया (बारा), २४ जेठ । राष्ट्रिय स्वतन्त्र पार्टी (रास्वपा) बाराका कार्यकर्ताहरूले कलैया उपमहानगरपालिका अधिवेशनपछि गरिएको उपनिर्वाचन खारेज गर्न माग गर्दै काठमाडौंस्थित पार्टीको केन्द्रीय कार्यालयमा धर्ना दिएका छन् । उनीहरूले अधिवेशनबाट निर्वाचित नेतृत्वलाई बेवास्ता गर्दै पुनः निर्वाचन गराइनु पार्टीको विधान तथा लोकतान्त्रिक अभ्यासविपरीत भएको बताएका छन् ।
कार्यकर्ताहरूका अनुसार २०८३ जेठ १७ गते सम्पन्न कलैया उपमहानगरपालिका अधिवेशनबाट उमाशंकर रौनियार १२४ मतसहित सभापतिमा निर्वाचित भएका थिए । निर्वाचन परिणाम सार्वजनिक भएसँगै उनको शपथग्रहणसमेत सम्पन्न भइसकेको थियो । तर त्यसको दुई दिनपछि ह्वाट्सएप समूहमार्फत पुनः उपनिर्वाचन हुने सूचना जारी गरिएपछि विवाद उत्पन्न भएको हो ।
रास्वपा कार्यकर्ता धिराज पटेलले पुनः निर्वाचनसम्बन्धी सूचना कुनै आधिकारिक पत्र, हस्ताक्षर वा जिम्मेवार पदाधिकारीको नामबिनै सार्वजनिक गरिएको दाबी गरे । उनका अनुसार निर्वाचन सम्पन्न भइसकेपछि ‘५० प्रतिशतभन्दा बढी मत प्राप्त नभएको’ कारण देखाउँदै पुनः निर्वाचन गराउने निर्णय गरिएको भनिएपनि उक्त विषय निर्वाचनकै दिन किन नउठाइएको भन्ने प्रश्न उठेको छ ।
पटेलले पार्टीका निर्वाचन प्रतिनिधि तथा नेतृत्वले विधानको सही व्याख्या गर्न नसकेको आरोप लगाउँदै विजयी घोषणा, माला र अबिर लगाएर औपचारिक रूपमा परिणाम स्वीकार गरिसकेपछि पुनः निर्वाचन गराउनु अनुचित भएको बताए । उनले उपनिर्वाचन सीमित प्रतिनिधिहरूबीच मात्र गराइएको तथा अधिकांश वडा प्रतिनिधिलाई सहभागिताबाट वञ्चित गरिएको आरोपसमेत लगाए ।
धर्नामा सहभागी कार्यकर्ताहरूले उपनिर्वाचन गराउनुपर्ने आधार र निर्णय प्रक्रिया सार्वजनिक गर्न, आन्तरिक पारदर्शिता कायम गर्न तथा निष्पक्ष ढंगले विवाद समाधान गर्न पार्टी नेतृत्वसँग माग गरेका छन् । उनीहरूले परिवर्तनको आशासहित पार्टीमा आबद्ध भएका समर्थकहरू पछिल्लो घटनाक्रमबाट निराश बनेको समेत बताएका छन् । 
प्रतिक्रिया दिनुहोस् !