वीरगंज (पर्सा), २४ जेठ । राष्ट्रिय स्वतन्त्र पार्टी (रास्वपा) पर्साको प्रथम जिल्ला अधिवेशन आन्तरिक विवादका कारण अन्योलमा परेको छ । मतदाता (जिल्ला प्रतिनिधि) नामावलीलाई लिएर देखिएको विवादले शनिबारदेखि स्थगित निर्वाचन प्रक्रिया आइतबार साँझसम्म पनि सुचारु हुन नसकेको हो । शनिबार होटल गेटवे वीरगंजमा अधिवेशनअन्तर्गत निर्वाचन प्रक्रिया चलिरहेका बेला मतदाता नामावलीको विषयमा दुई पक्षबीच विवाद चर्किएर हातपातको अवस्था सिर्जना भएपछि निर्वाचन समितिले प्रक्रिया आइतबार बिहान ८ बजेसम्मका लागि स्थगित गरेको थियो ।
त्यसपछि निर्वाचन समितिका संयोजक डा. नन्दन यादवले अर्को सूचना जारी गर्दै आइतबार अपराह्न ३ बजेदेखि निर्वाचन प्रक्रिया पुनः सञ्चालन गरिने जानकारी दिएका थिए । तर साँझ ५ः३० बजेसम्म पनि अधिवेशन तथा निर्वाचन प्रक्रिया सुरु हुन सकेन । अधिवेशनस्थल क्लासिक बैंक्वेटमा कार्यकर्ताहरू नेतृत्वको निर्णयको प्रतीक्षामा बसी रहे । विवाद समाधानका लागि काठमाडौंबाट आएका रास्वपाका संगठन विभाग सचिव शंकर श्रेष्ठको पहलमा होटल भिस्वामा दुवै पक्षका नेताबीच निरन्तर छलफल भएको थियो । पर्सा जिल्ला सभापति तथा पर्सा–१ का सांसद हरि पन्तले पनि सहमति जुटाउने प्रयास जारी रहेको बताएका छन् ।
यसैबीच, आइतबार बिहान वीरगंज महानगर सभापति दीपराज श्रेष्ठले महानगर समितिअन्तर्गतका सबै विभाग खारेज गरिएको घोषणा गरेपछि विवाद थप गहिरिएको बताइएको छ । पर्सामा पालिका अधिवेशनदेखि नै देखिएको गुटगत असहमति जिल्ला अधिवेशनको पूर्वसन्ध्यामा थप सतहमा आएको छ । जिल्लामा एक पक्षको नेतृत्व संस्थापक जिल्ला सभापति तथा सांसद हरि पन्तले गर्दै आएका छन् भने अर्कोतर्फ पर्सा–२ का सांसद सुशील साह कानु, पर्सा–३ का सांसद रमाकान्त चौरसिया र पर्सा–४ का सांसद टेकबहादुर शाक्य एकजुट भएर समानान्तर धार निर्माण गरेका छन् ।
पर्सा–२ का सांसद सुशील साह कानुले जिल्ला नेतृत्वमाथि १४ स्थानीय तहमध्ये ८ वटामा अधिवेशन नै सम्पन्न नगराएको आरोप लगाएका छन् । उनले जिल्ला प्रतिनिधि चयन प्रक्रियामा एकपक्षीय निर्णय गरिएको तथा विभिन्न विभाग गठन गरेर थप प्रतिनिधि समावेश गरिएको दाबी गरे । ‘यो गुट–उपगुटको मात्र विषय होइन, सही र गलत प्रक्रियाको प्रश्न हो,’ उनले भने, ‘पार्टी कुनै एक व्यक्तिको होइन । अधिवेशन र निर्वाचन प्रक्रिया पार्टीको विधान, विधि र निर्देशनअनुसार सञ्चालन हुनुपर्छ भन्ने हाम्रो अडान हो ।’ पक्ष–विपक्षबीच सहमति नजुटेसम्म जिल्ला अधिवेशन र निर्वाचन प्रक्रिया कहिले सुरु हुने भन्ने अझै स्पष्ट हुन सकेको छैन ।
प्रतिक्रिया दिनुहोस् !