वीरगंज (पर्सा), २१ जेठ । वीरगंज महानगरपालिका–९ स्थित जिल्ला प्रशासन कार्यालय पर्सा नजिक रहेको गढिमाई लजमा पार्किङ गरेर राखिएको विद्युतीय स्कुटरको ब्याट्री पड्किँदा बिहीबार बिहान आगलागी भएको छ । बिहान करिब ७ बजे भएको आगलागीबाट स्कुटर पूर्ण रूपमा जलेर नष्ट हुनुका साथै लजभित्र रहेका विभिन्न सामग्रीमा समेत क्षति पुगेको छ ।
केही पहिले मात्रै खरिद गरिएको मधेश प्रदेश ०३–०३९ प १४४३ नम्बरको विद्युतीय स्कुटर बिहीबार विहान केही बेर चलाएर, घर ल्याई पार्किङमा राखेका थिए । अचानक ब्याट्री पड्किएर आगलागी भएको गढिमाई लौजका संचालक किसन साह कानुले बताए । स्कुटरबाट एक्कासि धुवाँ निस्किन थालेपछि विस्फोटजस्तै आवाज आएको र लगत्तै आगो फैलिएको उनको भनाई छ ।
आगलागीबाट स्कुटरसहित लजभित्र रहेका फर्निचर, लत्ताकपडा, इन्टरनेट उपकरण, एसी, पंखालगायतका सामग्री जलेर नष्ट भएका छन् । तुरन्त पुगेका सशस्त्र प्रहरी बल, नेपाल प्रहरी, नेपाली सेना तथा वीरगंज महानगरपालिकाको दमकल घटनास्थलले आगो निभाएको थियो । क्षतिको विवरण संकलन भइरहेको प्रहरीले जनाएको छ । 
प्रतिक्रिया दिनुहोस् !