वीरगंज (पर्सा), २१ जेठ । तराई मधेशमा तापक्रम उल्लेख्य वृद्धि भएको छ । जल तथा मौसम विज्ञान विभागका अनुसार पछिल्ला केही दिनयता देशका तराई मधेश क्षेत्रमा तापक्रम बढ्दै गएको छ । विभागका मौसमविद् सरोज पुडासैनीका अनुसार तापक्रम क्रमशः बढ्ने क्रममा छ ।
विशेषगरी मधेस प्रदेश तथा कोशी, बागमती र गण्डकी प्रदेशका तराई क्षेत्रमा अझै केही दिन तातो मौसम रहने सम्भावना रहेको उनले बताए । वीरगंज सहित पर्सा, बारा, रौतहट तथा आसपासका क्षेत्रमा अत्यधिक गर्मीका कारण जनजीवन प्रभावित बनेको छ । दिउँसोको समयमा तापक्रम ३६ देखि ३९ डिग्री सेल्सियससम्म पुग्दा सर्वसाधारण घरबाहिर निस्कन कठिन भएको छ । गर्मीका कारण विद्यार्थी, दैनिक ज्यालामजदुरी गरेर जीविकोपार्जन गर्ने श्रमिक, रिक्सा तथा ठेला चालक, निर्माण क्षेत्रमा कार्यरत मजदुरहरू बढी प्रभावित भएका छन् ।
दिउँसो चर्को घाम र तातो हावाका कारण बजार क्षेत्र मानिस घटेको छ । ग्राहकको संख्या कम हुँदा व्यापार–व्यवसायमा असर परेको व्यवसायीहरूले बताएका छन् । अत्यधिक गर्मीका कारण डिहाइड्रेसन, टाउको दुख्ने, थकान तथा लु लाग्ने जोखिम बढेकाले पर्याप्त पानी पिउन र अत्यावश्यक कामबाहेक दिउँसोको समयमा बाहिर ननिस्कन चिकित्सकहरूले सल्लाह दिएका छन् । 
प्रतिक्रिया दिनुहोस् !