वीरगंज (पर्सा), १९ जेठ । वीरगंज महानगरपालिकाका मेयर राजेशमान सिंहलाई नागरिकता लिखतसम्बन्धी कसुरको अनुसन्धानका लागि प्रहरीले नियन्त्रणमा लिएर पर्सा जिल्ला अदालतमा उपस्थित गराएको छ । पर्सा जिल्ला अदालतबाट जारी पक्राउ पुर्जी कार्यान्वयन गर्दै जिल्ला प्रहरी कार्यालय पर्साको टोलीले उनलाई मंगलबार बिहान पर्साको ठोरी क्षेत्रबाट नियन्त्रणमा लिएर पर्सा जिल्ला अदालतमा उपस्थित गराएको हो ।
मेयर सिंहलाई ठोरी गाउँपालिका–२ स्थित ठोरी जंगल रिसोर्ट नजिकबाट नियन्त्रणमा लिएर थप कानुनी प्रक्रियाका लागि पर्सा जिल्ला अदालतमा उपस्थित गराइएको पर्सा प्रहरीले जनाएको छ । नागरिकता लिखतसम्बन्धी कसुरको अनुसन्धानका लागि पर्सा जिल्ला अदालतले जेठ १२ गते मेयर सिंहविरुद्ध पक्राउ पुर्जी जारी गरेको थियो । पक्राउ पुर्जी जारी भएको भोलिपल्ट अर्थात् जेठ १३ गते उनी स्वयं अदालतमा उपस्थित भएका थिए । तर त्यस दिन अदालतमा मुद्दाको चाप अत्यधिक रहेका कारण आफ्नो मुद्दाको सुनुवाइ हुन नसक्ने जानकारी पाएपछि फर्किएको उनले बताएका थिए ।
यस प्रकरणमा अदालतले मेयर सिंहसँगै उनकी कान्छी श्रीमती भनिएकी सिन्धुपाल्चोकको इन्द्रावती नगरपालिकाकी रिता भट्टराई तथा वीरगंज महानगरपालिका–३ का तत्कालीन स्थानीय पञ्जिकाधिकारी भिखारी रायविरुद्ध पनि पक्राउ पुर्जी जारी गरेको छ । अनुसन्धानका क्रममा रिता भट्टराईकी छोरी रुविना श्रेष्ठलाई आफ्नै छोरीका रूपमा देखाई फर्जी जन्मदर्ता तयार गरिएको र सोही आधारमा नागरिकता बनाइएको आरोप लगाइएको छ । उक्त कार्य नागरिकता लिखतसम्बन्धी कसुरअन्तर्गत पर्ने भन्दै मुद्दा दर्ता गरिएको हो । यद्यपि मेयर सिंहले भने रिता भट्टराई आफ्नो दोस्रो श्रीमती भएको दाबी गर्दै आएका छन् ।
वीरगंज महानगरपालिका–३ निवासी लियाकत अलीले २०८० माघमा सरकारी कागजात तथा नागरिकता किर्तेसम्बन्धी उजुरी जिल्ला प्रहरी कार्यालय पर्सामा दर्ता गराएका थिए । सोही उजुरीका आधारमा अनुसन्धान अघि बढ्दै जाँदा मेयर सिंहविरुद्ध चारवटा छुट्टाछुट्टै मुद्दा दर्ता भएका थिए । तीमध्ये नागरिकता लिखतसम्बन्धी कसुरको मुद्दामा अदालतले पक्राउ पुर्जी जारी गरेको बताइएको छ । 
प्रतिक्रिया दिनुहोस् !