वीरगंज (पर्सा), १८ जेठ । राष्ट्रिय स्वतन्त्र पार्टी (रास्वपा) वीरगंज महानगर समितिको प्रथम अधिवेशनबाट दीपराज पटेल सभापतिमा निर्वाचित भएका छन् । आइतबार सम्पन्न निर्वाचनमा उनले आफ्ना प्रतिद्वन्द्वी महमद महुदीन आलमलाई ४७ मतले पछि पार्दै महानगर समितिको नेतृत्व आफ्नो पक्षमा पारेका हुन् । निर्वाचन परिणामअनुसार पटेलले २२६ मत प्राप्त गरे भने आलमको पक्षमा १७९ मत परेको थियो ।
सभापतिमा विजयी पटेल पर्सा क्षेत्र नम्बर २ का प्रतिनिधिसभा सदस्य सुशील कुमार साह कानु तथा रास्वपा नेता सुधिर पटेल निकट समूहको समर्थनमा चुनावी मैदानमा उत्रिएका थिए । उनका प्रतिस्पर्धी आलम भने पर्सा क्षेत्र नम्बर १ का प्रतिनिधिसभा सदस्य हरि पन्त पक्षीय समूहका उम्मेदवार थिए । उपसभापति पदमा परितोष कुमार द्विवेदी विजयी भएका छन् । उनले १८४ मत प्राप्त गर्दै सफलता हासिल गर्दा निखिल बर्णवालले १७६ मत र विशाल कुमार पटेलले २९ मत प्राप्त गरे । द्विवेदी सांसद पन्त समूहबाट उम्मेदवार बनेका थिए भने कानु–सुधिर पटेल समूहका बर्णवाल पराजित भए ।
सचिव पदमा गौतम कुमार श्रेष्ठ २३२ मतसहित निर्वाचित भए । उनका प्रतिस्पर्धी जुनैद अन्सारीले १६६ मत प्राप्त गरेका थिए । यस्तै, सहसचिव पदमा मुन्ना साह तेली १८८ मतसहित विजयी बने। उक्त पदका अर्का उम्मेदवार राजनन्दन प्रसाद कलवारले १७१ मत तथा ऋषिकेश गुप्ताले ४५ मत प्राप्त गरेका थिए । निर्वाचनबाट महानगर समितिको सदस्य पदमा प्रमोद कुमार पटेल, रञ्जितकुमार पटेल, आजम मन्सुरी, जितेन्द्र प्रसाद सोनार, अर्जुन पटेल, राजेश प्रसाद सोनार, मोहन प्रसाद सोनार, चन्दन महतो कहार, दीपक ठाकुर, सदरे आलम अन्सारी, कन्हैया साह, पिंकी कुमारी साह, राज्दा खातुन, अञ्जु चौरसिया, पूर्णिमा शर्मा, मीना देवी, सावित्री घिमिरे, शोभा गुप्ता तथा दिप्सना गिरी निर्वाचित भएका छन् ।
प्रमुख निर्वाचन अधिकृत तुलसा अधिकारी पौडेलका अनुसार नयाँ नेतृत्व चयनका लागि भएको निर्वाचनमा कुल ४८४ मतदातामध्ये ४८३ जनाले मतदान गरेका थिए । अत्यन्त उच्च सहभागितासहित सम्पन्न निर्वाचनपछि रास्वपा वीरगञ्ज महानगर समितिले नयाँ नेतृत्व प्राप्त गरेको छ । नवनिर्वाचित नेतृत्वले अब महानगरभित्र पार्टी संगठन विस्तार, जनसम्पर्क अभिवृद्धि तथा आगामी राजनीतिक गतिविधिलाई थप प्रभावकारी ढंगले अघि बढाउने अपेक्षा गरिएको छ । 
प्रतिक्रिया दिनुहोस् !