गौर (रौतहट), १५ जेठ । जिल्ला प्रहरी कार्यालय रौतहटले विभिन्न आपराधिक गतिविधिमा संलग्न भई अदालतबाट सजाय तथा जरिवाना फैसला भएका फरार प्रतिवादीहरूविरुद्ध विशेष अभियान तीव्र बनाएको छ । सोही अभियानअन्तर्गत प्रहरीले जिल्लाका विभिन्न स्थानबाट १६ जना फरार प्रतिवादीलाई एकैपटक पक्राउ गर्न सफलता हासिल गरेको छ ।
लामो समयदेखि कानुनी दायराबाट बाहिर रही लुकिछिपी बस्दै आएका प्रतिवादीहरूलाई सुराकी तथा विशेष अपरेसनमार्फत नियन्त्रणमा लिइएको प्रहरीले जनाएको छ । पक्राउ परेकामध्ये चेक अनादर (चेक बाउन्स), कुटपिट, लुटपाट तथा बालबालिका बेचबिखनजस्ता गम्भीर मुद्दाका अभियुक्तहरू रहेको जनाइएको छ । प्रहरीका अनुसार पक्राउ गरिएका सबै प्रतिवादीलाई आवश्यक कानुनी प्रक्रिया तथा फैसला कार्यान्वयनका लागि रौतहट जिल्ला अदालत मा बुझाइसकिएको छ ।
वसन्त गौतमका अनुसार पक्राउ परेकामध्ये एकजना बालबालिका बेचबिखन मुद्दामा संलग्न मुख्य प्रतिवादीसमेत रहेका छन् । अन्य अधिकांश पक्राउ पर्नेहरू भने पछिल्लो समय वित्तीय अपराधका रूपमा बढ्दै गएको चेक अनादर मुद्दाका फरार अभियुक्तहरू रहेको उनले जानकारी दिए । पक्राउ परेका केही अभियुक्तलाई अदालतले कैद सजाय सुनाएको थियो भने अधिकांशमाथि जरिवानाको फैसला भएको प्रहरीले जनाएको छ । विशेष अभियानअन्तर्गत पक्राउ गरिएका प्रतिवादीहरूबाट तत्काल ११ हजार ६ सय रुपैयाँ जरिवाना असुलउपर गरिएको पनि प्रहरीको भनाइ छ ।
रौतहट प्रहरीले समाजमा बढ्दो दण्डहीनता अन्त्य गर्दै अदालतको आदेश प्रभावकारी रूपमा कार्यान्वयन गराउने उद्देश्यले यस्तो अभियान सञ्चालन गरिएको जनाएको छ । डीएसपी गौतमले जिल्लाका अन्य स्थानमा लुकिछिपी बसेका फरार प्रतिवादीहरूको सूची तयार गरी खोजी तथा निगरानी कार्यलाई थप तीव्र पारिएको उल्लेख गर्दै कुनै पनि अपराधी कानुनी कारबाहीबाट उम्किन नसक्ने स्पष्ट पारे । 
प्रतिक्रिया दिनुहोस् !