जनकपुर (धनुषा), १५ जेठ । नेपाल पत्रकार महासंघ मधेश प्रदेश समितिको आफ्नै प्रादेशिक भवन निर्माणका लागि शुक्रबार शिलान्यास गरिएको छ । गणतन्त्र दिवसको अवसर पारेर आयोजित कार्यक्रममा मधेश प्रदेश सरकारका गृह, सञ्चार तथा कानुन मन्त्री फकिरा महतोले जनकपुरधाम उपमहानगरपालिका–४ स्थित भवनको शिलान्यास गरेका हुन् ।
सो अवसरमा मन्त्री महतोले पत्रकार महासंघको प्रादेशिक कार्यालयलाई सुविधा सम्पन्न भवनका रूपमा निर्माण गरिने बताए । उनले महासंघका पदाधिकारी, अर्थ मन्त्रालय तथा गृह, सञ्चार तथा कानुन मन्त्रालयबीच समन्वय गरी आगामी बजेटमार्फत आवश्यक रकम व्यवस्थापन गरिने जानकारी दिए ।
कार्यक्रममा नेपाल पत्रकार महासंघ मधेश प्रदेशका अध्यक्ष श्याम बन्जाराले अग्रज पत्रकारहरूले देखेको सपना पूरा गर्ने अभियान सुरु भएको बताए । उनले नेपालमै पहिलोपटक मधेश प्रदेश समितिको आफ्नै भवन निर्माणको सपना साकार भएको उल्लेख गर्नुभयो । प्रारम्भिक चरणमा दुई कोठे भवन निर्माण कार्य सुरु गरिएको छ । शिलान्यास कार्यक्रमको सहजीकरण महासंघ प्रदेशका महासचिव शैलेन्द्र महतोले गरेका थिए । 
प्रतिक्रिया दिनुहोस् !