वीरगंज (पर्सा), १२ जेठ । मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउ महाअभियान नेपाल’ का संयोजक दुर्गा प्रसाईंं पर्सा जिल्ला अदालतको आदेशपछि साधारण तारेखमा रिहा भएका छन् । मंगलबार भएको थुनछेक बहसपछि अदालतले उनलाई रिहा गर्न आदेश दिएको हो । पर्सा जिल्ला अदालतका श्रेस्तेदार प्रभाकर कुमार मल्लिकका अनुसार विद्युतीय कारोबार तथा राज्यविरुद्धको कसुर सम्बन्धी मुद्दामा इजलास नं. १ का न्यायाधीश गायत्री प्रसाद रेग्मीको इजलासले प्रसाईंलाई साधारण तारेखमा छाड्न आदेश दिएको हो ।
अदालतका अनुसार अभियोगपत्र सोमबार बेलुका ढिलो दर्ता भएकाले मंगलबार मात्रै थुनछेक बहस तथा सुनुवाइ प्रक्रिया सम्पन्न गरिएको थियो । वडा प्रहरी कार्यालय विर्ताका प्रहरी निरीक्षक विक्रम सुवेदीको जाहेरीका आधारमा प्रसाईंविरुद्ध मुद्दा दर्ता गरिएको जनाइएको छ । दुर्गा प्रसाईंलाई गत जेठ ४ गते राति वीरगंजस्थित सिद्धार्थ दियालो होटलबाट पर्सा प्रहरीले नियन्त्रणमा लिएको थियो । वीरगंज भ्रमणका क्रममा पक्राउ परेका प्रसाईंले आफूलाई गैरकानुनी रूपमा हिरासतमा राखिएको दाबी गर्दै सर्वोच्च अदालतमा बन्दी प्रत्यक्षीकरणको रिट दायर गरेका थिए ।
उक्त रिटमाथि सुनुवाइ गर्दै सर्वोच्च अदालतका न्यायाधीश विनोद शर्मा र नित्यानन्द पाण्डेयको संयुक्त इजलासले निवेदन खारेज गर्दै सरकारका नाममा आवश्यक आदेश जारी गरेको थियो । यसअघि सर्वोच्च अदालतले आइतबारसम्म रिहा गर्न आदेश दिएको दाबी गर्दै त्यसको कार्यान्वयन नभएको आरोपमा प्रसाईंका समर्थकहरूले सोमबार पर्सा जिल्ला अदालत अगाडिको सडकमा प्रदर्शन गरेका थिए । मंगलबार रिहा भएपछि उनका समर्थकहरूले वीरगंजमा प्रसाईंको स्वागत गरेका थिए । 
प्रतिक्रिया दिनुहोस् !