वीरगंज (पर्सा), १० जेठ । वीरगंजको मुख्य व्यापारिक क्षेत्र मेनरोडलाई शहरी मार्ग कायम गर्न माग गर्दै स्थानीय घरधनी तथा व्यवसायीहरूले आइतबार प्रदर्शन गरेका छन् । वीरगंज संघर्ष समितिको नेतृत्वमा भएको विरोध कार्यक्रममा सहभागीहरूले थाल बजाएर सरकारको ध्यानाकर्षण गराएका थिए । प्रदर्शनमा सहभागीहरू मेनरोड क्षेत्र परिक्रमा गर्दै घण्टाघरसम्म पुगेका थिए । उनीहरूले मेनरोडलाई तत्काल औपचारिक रूपमा शहरी मार्ग घोषणा गर्न सरकारसँग माग गरेका छन् ।
प्रदर्शनका क्रममा सहभागीहरूले शहरी मार्ग घोषणाले वीरगंजको यातायात व्यवस्थापन, व्यापारिक गतिविधि र शहरको सौन्दर्यीकरणमा सकारात्मक प्रभाव पार्ने बताएका थिए । संघर्ष समितिले मन्त्रिपरिषद्को निर्णयअनुसार त्रिभुवन राजपथलाई मेनरोड क्षेत्रबाट हटाइसकिएको दाबी गरेको छ । समितिका अनुसार नेपाल सरकारको आधिकारिक वेबसाइट तथा सरकारले प्रकाशन गर्ने ‘रोड डायरी’ मा समेत आवश्यक संशोधन भइसकेको छ । यस्तो अवस्थामा अब मेनरोडलाई शहरी मार्गको रूपमा औपचारिक मान्यता दिनुपर्ने उनीहरूको मुख्य माग रहेको छ ।
विरोध कार्यक्रममा स्थानीय व्यापारी, घरधनी, सर्वसाधारण, महिला तथा बालबालिकाको समेत उल्लेखनीय उपस्थिति रहेको थियो । प्रदर्शनकारीहरूले मेनरोडलाई शहरी मार्ग कायम गरिए वीरगंजको बजार व्यवस्थापन थप व्यवस्थित हुने र व्यापारिक वातावरणलाई सहज बनाउन मद्दत पुग्ने विश्वास व्यक्त गरेका छन् । प्रदर्शनका क्रममा सहभागीहरूले माग सम्बोधनमा ढिलाइ भए थप कडा आन्दोलनका कार्यक्रम घोषणा गरिने चेतावनी समेत दिएका छन् । वीरगंज युवा तथा व्यापारी सडक पीडित संघर्ष समितिका अध्यक्ष कुन्दन रौनियार ले सरकारलाई जनचासोसँग जोडिएको विषय भएकाले शीघ्र निर्णय लिन आग्रह गरेका छन् ।
स्थानीयवासीका अनुसार मेनरोड वीरगंजको व्यापारिक तथा सामाजिक गतिविधिको प्रमुख केन्द्र भएकाले यसलाई शहरी मार्गका रूपमा विकास गर्न सके शहर व्यवस्थापनमा दीर्घकालीन सकारात्मक प्रभाव पर्ने अपेक्षा गरिएको छ ।
प्रतिक्रिया दिनुहोस् !