कलैया (बारा), ८ जेठ । बाराका एक पुरुषको हत्या गरेको आरोपमा फरार रहेका एक अभियुक्तलाई चितवन प्रहरीले पक्राउ गरेको छ । हत्याको करिब ७ वर्षपछि अभियुक्त पक्राउ परेका हुन् । पक्राउ पर्नेमा बाराको फेटा गाउँपालिका–४ का पञ्चदेव महरा (पुनदेव) रहेका छन् ।
२०७६ साल चैत २३ गते चितवनको खैरहनी नगरपालिका–९ स्थित नेपाल ग्यास उद्योग गण्डकीको कम्पाउन्डभित्र मजदुर बस्ने कोठामा ४६ वर्षीय सखिचन महराको शव फेला परेको थियो । मृतक पनि बाराको फेटा गाउँपालिका–३ बासिन्दा थिए । घटनापछि प्रहरीले गरेको अनुसन्धानबाट सखिचन महराको हत्या पञ्चदेव महराले गरेको खुलेको थियो ।
त्यसपछि चितवन जिल्ला अदालतबाट २०७६ चैत २५ गते पक्राउ अनुमति जारी गरिएको भएपनि आरोपी लामो समयदेखि फरार थिए । प्रहरीले निरन्तर खोजतलास जारी राखेका क्रममा आरोपी फेटा गाउँपालिका–१ त्रिवेणी क्षेत्रमा लुकीछिपी बसिरहेको गोप्य सूचना प्राप्त भएको र सोही सूचनाको आधारमा इलाका प्रहरी कार्यालय टाँडी र खैरहनीबाट खटिएको संयुक्त टोलीले उनलाई जेठ ५ गते पक्राउ गरेको कुरा जिल्ला प्रहरी कार्याल चितवनले शुक्रबार सार्वजनिक गरेको छ ।
पक्राउ परेका महरालाई चितवन जिल्ला अदालतबाट म्याद थप गरि हाल इलाका प्रहरी कार्यालय खैरहनीको हिरासतमा राखिएको छ ।
प्रतिक्रिया दिनुहोस् !