वीरगंज (पर्सा), ७ जेठ । वीरगंज स्थित ठाकुरराम बहुमुखी क्याम्पस र भारतको इन्स्टिच्युट अफ इन्फर्मेशन टेक्नोलोजी एन्ड म्यानेजमेन्ट (आईआईटीएम) बिच समझदारी पत्र (एमओयू) मा हस्ताक्षर भएको छ । त्रिभुवन विश्वविद्यालयअन्तर्गत रहेको ठाकुरराम बहुमुखी क्याम्पस तथा गुरु गोविन्द सिंह इन्द्र प्रस्थ विश्वविद्यालय भारत अन्तर्गतको आईआईटीएमबीच भएको उक्त सम्झौताले सूचना प्रविधि र व्यवस्थापन शिक्षामा अन्तर्राष्ट्रिय सहकार्यलाई थप मजबुत बनाउने बताइएको छ ।
प्रा. डा. स्वयम्भू शलभको संयोजकत्वमा सम्पन्न कार्यक्रममा आईआईटीएमका तर्फबाट संस्थाकी निर्देशक प्रा. डा. रचिता राणाले तथा ठाकुरराम बहुमुखी क्याम्पसका तर्फबाट क्याम्पस प्रमुख डा. केशव प्रसाद यादव, सूचना प्रविधि संकायका निर्देशक उपप्राध्यापक सञ्जय कुमार दास र व्यवस्थापन संकायका निर्देशक उपप्राध्यापक जितेन्द्र कुमार सिंहले एमओयूमा हस्ताक्षर गरेका थिए ।
कार्यक्रममा क्याम्पस प्रमुख डा. यादवले उक्त अन्तर्राष्ट्रिय सम्झौता क्याम्पसको शैक्षिक गुणस्तर अभिवृद्धि गर्दै विश्व स्तरीय मानकअनुसार शिक्षा प्रणाली विकास गर्ने दिशामा महत्वपूर्ण कदम भएको बताए । 
प्रतिक्रिया दिनुहोस् !